भांगरभूंय | प्रतिनिधी
ते फुडाराचें नेतृत्व घडोवपी, सहकाऱ्यांचो सन्मान करपी आनी अंतर्गत लोकशायेचेर विश्वास दवरपी फुडारी आसले. तांची नेतृत्वशैली सल्लामसलत, समजूतदारपणा आनी मनीसपणान भरिल्ली आसली.
अटलबिहारी वाजपेयी (1924–2018) भारतीय राजकारणांतलें एक सामकें सन्माननीय, प्रेरणादायी आनी बहुआयामी व्यक्तिमत्व आसलें. कवी, विचारवंत, संघटक आनी कुशल राजकारणी ह्या सगळ्यांचो अद्वितीय संगम तांच्या व्यक्तिमत्वांत दिसून येता. एक समर्पित कार्यकर्तो म्हणून सुरू जाल्लो तांचो प्रवास भारताच्या प्रधानमंत्री पदामेरेन पावलो आनी संवसारीक पांवड्यार एक आदरणीय फुडारी म्हणून पुराय संवसारभर तांची नामना जाली.
कार्यकर्तो म्हूण वाटचाल
वाजपेयी हांची राजकीय कारकीर्द राष्ट्रीय स्वयंसेवक संघाचे प्रचारक म्हणून सुरू जाल्ली. तरणाटेपणांतूच तांणी शिस्त, राष्ट्रभक्ती, सादेंपण आनी निःस्वार्थ सेवेचे संस्कार आत्मसात केल्ले. सत्तेची वा पदाची आस नाशिल्ले वाजपेयी विचारांचेर आदारिल्लें राजकारण करपी फुडारी आसले.
भारतीय जनसंघाच्या उदरगतींत तांणी मोलादीक योगदान दिलें. फुडें भारतीय जनता पक्षाच्या स्थापनेंत ते एक व्हड आधारस्तंभ आसले. बूथ पांवड्यावेल्या कार्यकर्त्यां कडेन आपलें नातें सांबाळून दवरुन देशव्यापी दृष्टी मांडपाची तांची तांक विलक्षण आसली. मजबूत संघटने बगर लोकशाय तिगूंक शकना, हो तांचो खर विश्वास आसलो.
संघटन कुशळटाय
वाजपेयी हांची संघटन कुशळटाय सगल्यांक आस्पावन घेवप, संयम आनी नैतिक अधिश्ठानाचेर आदारिल्ली आशिल्ली. मतभेद आसूनूय संवादांतल्यान एकचार घडोवपाची तांची खाशेलताय आसली. भाजपाचे अध्यक्ष (1980–86) म्हणून पक्षाक राष्ट्रीय पांवड्यार एक पर्याय म्हणून निर्माण करपाची बुन्याद तांणी घाली.
ते फुडाराचें नेतृत्व घडोवपी, सहकाऱ्यांचो सन्मान करपी आनी अंतर्गत लोकशायेचेर विश्वास दवरपी फुडारी आसले. तांची नेतृत्वशैली सल्लामसलत, समजूतदारपणा आनी मनीसपणान भरिल्ली आसली.
संसदीय श्रेश्ठताय
वाजपेयी धा फावटी लोकसभेचेर जिखून आयले. ते भारतांतल्या श्रेश्ठ संसदीय वक्त्यां मदले एक नामनेचे वक्ते म्हणून तांची नामना आसली. तांच्या भाषणांतलो ओज, विनोदबुद्धी आनी वैचारिक स्पष्टताय विरोधकांकय प्रभावित करताली.
1977–79 ह्या काळांत परराष्ट्रमंत्री म्हणून तांणी संयुक्त राष्ट्रसंघांत हिंदींतल्यान भाषण करून भारताची भाषिक आनी सांस्कृतिक अस्मिताय संवसारीक पांवड्यार पावयली. 1996 तल्या 13 दिसांच्या प्रधानमंत्री पदांतल्या काळांत तांणी राजकी नैतिकतायेची बेसबरी देख दिली—वेंचणुकेंत जिखून आयिल्लो सगल्यांत व्हडलो पक्ष आसून लेगीत संसदेंत तेदे वेळार आपले कडेन बहुमत नाशिल्ल्यान तांणी सत्तेचो आग्रह धरलो ना तर सरळ राजीनामो दिलो आनी मंत्रीमंडळ बरखास्त केलें.
प्रधानमंत्रीपदांतली कामगिरी
1998 ते 2004 ह्या काळांत प्रधानमंत्री म्हणून अटलबिहारी वाजपेयींनी जायते इतिहासिक निर्णय घेतले:
1. पोखरण अणुचाचण्यो (1998) : भारताची सामरिक स्वायत्तता अधोरेखित केली
2. अर्थिक सुधारणांक चालना : विकासावांगडा सामाजिक न्यायाचेर भर
3. मुळाव्यो सुविधा : सुवर्ण चतुर्भुज महामार्ग योजना, प्रधानमंत्री ग्रामसडक योजना
4. शिक्षण : सर्व शिक्षा अभियानांतल्यान सार्वत्रिक शिक्षणाचो बुन्याद घटमूट केली
5. अंत्योदयाची संकल्पना : समाजाच्या निमण्या घटका मेरेन विकास आनी उदरगत पावोवपाचो यत्न
राजकारणांतलें योगदान
वाजपेयी हांचें परराष्ट्र धोरण वास्तववादी आसूनूय मानवतावादी आसलें. लाहोर बस यात्रा हो शांती आनी संवादाचो प्रतिकात्मक पांवडो आसलो. राष्ट्रहित सांबाळीत संवसारीक पांवड्यार सहकार्य वाडोवपाचेर तांणी भर दिलो. देशांतर्गत राजकारणांत तांणी ‘एकचार आनी विविधताय’ ह्या भारतीय मूल्यांचो सन्मान राखलो आनी घटनात्मक संस्थांची प्रतिष्ठा सदांच सांबाळ्ळी.
समाजीक योगदान
राजकारणा वांगडाच वाजपेयी हे एक संवेदनशील साहित्यिक आनी कवी आसले. तांच्या कवितांतल्यान मानवतावाद, राष्ट्रप्रेम आनी तत्त्वज्ञान व्यक्त जाता. राजकारण समाजाक जोडपाचें आसचें, फाटोवपाचें न्हय — अशी तांची सामकी खर भूमिका आसली.
समाजीक जीवनांतली उपयुक्तताय
आयच्या काळांत वाजपेयी हांचे विचार सामके महत्त्वाचे आसात हें दिसून येता. संवाद, सहिष्णुताय, राष्ट्रभक्ती आनी मनीसपण हांचो समतोल साधपाचो तांचो दृश्टिकोन आयच्या नेतृत्वाक मार्गदर्शक थारूंक शकता. अटलजींचें पुराय जीवन समाजाच्या निमाण्या पांवड्यार आशिल्ल्या मनशाचें जीवन चड सोपें आनी बरें करपाक समर्पित आसलें.
तांणी केंद्रांत आदिवासी कार्य मंत्रालयाची स्थापना केली, जातूंतल्यान आदिवासी समाजाच्या सर्वांगीण विकासाक वाट मोकळी जाली. आज आदिवासी कार्य मंत्रालयांतल्यान राबयतात ती पीएम जनमन आनी धरती आबा, आदिवासी ग्राम उत्कर्ष योजना ह्या धोरणात्मक उपक्रमांक लागून छत्तीसगडा सयत देशांतल्या सगळ्या आदिवासी बहुल राज्यांक ताचो लाभ जाता.
शालेय शिक्षणाक चालना दिवपाक अटलजींनी सुरू केल्लें सर्वशिक्षा अभियान, हाका लागून देशांतल्या सगळ्या अर्थिक स्तरांतल्या भुरग्यांक शालेय शिक्षण सुलभ जालें. परदेशांत राबितो करून रावपी भारतीय वंशजांक देशाच्या विकास यात्रे कडेन जोडपाक अटलजींनी प्रवासी भारतीय दिवस कार्यक्रम सुरू केलो—हातूंतल्यान तांची दूरदृश्टी दिसता.
वाजपेयी फकत प्रधानमंत्री न्हय, तर एक चलती- भोंवती संस्था आसले. सामान्य कार्यकर्त्या सावन संवसारीक पांवड्यावेल्या फुडाऱ्यां मेरेन तांचो प्रवास मूल्याधिष्ठित राजकारणाची प्रेरणादायी देख आसा. तांचें जीवन फुडल्या पिळग्यांक राजकारण म्हणल्यार सेवा आनी राष्ट्रनिर्मिती म्हणल्यार नैतिक कर्तव्य आसा, हाची जाणीव करून दिता. हाचीच याद सगल्या देशवासियांक सदां खातीर उरची म्हणून 25 डिसेंबर ही तांची जयंती भारतांत सुशासन दीस म्हणून मनयतात.
डॉ. गुणाजी सदानंद देसाय
9403965626
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
