म्हजो गांव

भांगरभूंय | प्रतिनिधी

सांगपाचें म्हणल्यार म्हजो गांव जावन आसा सांकोर्डा. पूण हालीं तेपार हांव रावतां कुडचड्यार. म्हगेली जल्मभूंय ही जावन आसा सांकोर्डा. सैम भरून ओतता असलो म्हजो गांव. ह्या गावांत कितेंच ना अशें ना. हांगां कितें आसा अशें म्हणचे परस हांगां कितें ना अशें विचारलें तर तें चूक जावचें ना.
कुडचडेच्या रस्त्यापरसूय म्हज्या गांवांतले रस्ते सोबीत आनीक तोखणाय करपा सारके आसात. गाडी चलयताना दोळे धांपून तूं ती चलय अशें म्हणूं येता. ही हांवेंन तुमकां ओपार सांगल्या. म्हजो सांगपाचो अर्थ म्हणल्यार इतले हांगसरले रस्ते बरे. खऱ्यांनीच दोळे धांपून गाडी चलोवची न्ही तशी चलयत जाल्यार अपघात जावं येता हें सामकें मतींत दवरचें. हांगां व्हडलीं व्हडलीं कुळागरां आसात.
तातूंतल्यान उदकाचे पाट व्हांवतात. ऊदकाचो आवाज भेसबरो येता. आयकन आयकन सो दिसता. हांगां शाळा आसात. स्कूलां आसात. कॉलेज आसा. तातूंत शिकपी भुरगींय चड आसात.
पयलीं तेंपार कितें जातालें हांगसरल्या भुरग्यांक शिकपाक लागून शारांत वचचें पडटालें. पूण, आतां तसलें कांयच करचें पडना.आयज गांवांत रावता तांचे कडेन गाडयो आसात. बसींचीय येरादारी चालूच आसता. ही जावन आसा एक बरी गजाल. गांधीन एका तेपार अशें म्हणिल्लें तें म्हळ्यार खरो भारत गांवांनी आसा. हें मात सामकें हांवेंन मतींत दवरलां. आनीक ही गांधीजीचीं उतरां शंभर टक्के सत आसात अशें म्हाका तरी दिसता.
म्हज्या गांवांत ना म्हूण कसलेंच प्रदुशण ना. पर्यावरणान मात तो नटिल्लो पळोवपाक मेळटा. म्हज्या गांवातले लोक कश्टी आसात. शेतांत काम करपी आसात. भात पिकोवपी आसात. नाल्ल सुपारी, केळीं असली उत्पन्ना ते घेतात. ताका लागून ते सुखी जिवीत जगतात. देखून फाल्यांचें कितें ही चिंता तांकां आशिल्ली पळोवपाक मेळना ही एक जावन आसा बरी गजाल. रगाडा ही व्हडली न्हंय म्हज्या गांवांतल्यान व्हांवता. आतां गिमा दिसांनी ती शांत आसता. पूण, पावसाच्या दिसांनी तिका पळोवन भिरांत दिसता. तेन्ना ती ल्हान न्हंय व्हडली जाल्ली पळोवपाक मेळटा. पयलीं म्हजो गांव सांगें तालुक्यांत येतालो. पूण, जेन्ना धारबांदोडा हो बारावो तालुको जालो तेन्ना म्हजो गांव धारबांदोडा ह्या तालुक्यांत पडपाक लागलो. हो तालुको लागीं जाल्ल्यान लोकांचीं सरकारी कामांय बेगोबेग जावपाक लागलीं. ताका लागून हांगसरल्या लोकांक चड थाकाय मेळटा.