भांगरभूंय | प्रतिनिधी
तुळशीचें लग्न जालें काय सवायशीण बायलांक सुलूस लागता ती मार्गशिर्ष बिरेस्तारांची. हे सगले बिरेस्तार बायलो भक्तीभावान पुजतात. तुळस, देवघराची नितळसाण करतात. देवाचीं आयदनांय घालून दवरतात. दुसरे दीस दाराच्या हुंबऱ्याचेर शुभलाभ रांगोळी घालतात. दाराक आंब्याचीं पानां, रोजांचें तोरण बांदतात. न्हावन धुवून दोन केळी आनी दुदाची च्या घेतात आनी उपास धरतात. देवाचे कुडीन लामणदिवो पेटत आसता. कुशीक दिवली. मागीर पाटाचेर तबक दवरून तातूंत दोन मुठी तांदुळ घालतात. तांब्याचो कलश, तातूंत उदक, हळद, कुकुम, पानाचो विडो आनी नाणें घालतात. कलशाचेर आब्याचो ताळो दवरतात. कलशाक महालक्ष्मीचें सुंदर म्होवाळें बांदतात. तकलेर मुकूट, नाकांत नथ, गळ्यांत मंगळसुत्र घाल्ले महालक्ष्मीक पळोवन मन धादोस जाता. थोडी बायलां पांच तरांच्या फुलांच्यो ल्हान फांदयो दवरतात. सांजवेळ जालो काय सवायशीण बायल पुजेक बसतात. फोटोक आनी नाल्लाक हळदकुकूम आनी फुलां ओंपतात. भक्तीभावान कलशाची पुजा करतात. फळांचो निवेद दाखयतात. तिनसांजेक म्हालक्ष्मीची आरती करतात. मागीर कापराची, धुपारती दाखयतात. सगले तल्लीन जातात. मागीर देवीक गोड पदार्थांचो नैवेद्य दाखयतात. तरेकवार जिनस पानार वाडिल्ले आसतात. गोमातेक एक पान दाखयतात.
ह्या व्रता फाटल्यान एक दंतकथा आसा. द्वापार युगांत सौराष्ट्राचो राजा भ्रद्रश्रवा, ताची राणी सुरतचंद्रिका, चली श्यामबाला आनी महालक्ष्मी कथेचें पठण ह्या व्रताच्या निमतान करपाची पद्दत आसा. आपले कडेन बरें आसा ताचे विशीं बरे भाव बाळगप, सदांच समाधानी मानप कित्याक म्हत्वाचें तें भ्रद्रश्रवा राजाचे कथेंतल्यान महालक्ष्मीन सांगलां. हें व्रत भक्तीभावान पाळीत जाल्यार घरांत पयसो येता, गिरेस्तकाय, सुख समाधान येता. उद्देग धंद्यांत भरभराट जाता. भलायकी बरी उरता. हें व्रत करपांत आमच्या गोंयकार बायलांचो हात धरपी कोण ना. सण- परब आयली काय तांच्या चॅऱ्याचेर उमेदीचें ल्हार व्हांवता. तांकां व्रताचें फळ ह्याच जल्मात मेळटा. दुबाव ना.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
