भांगरभूंय | प्रतिनिधी
पयशांचो वेव्हार करतना भावना कुशीक दवरप म्हत्वाचें. तुमचे कडेन विस्वासांत घेवपा सारको संबंद आसलो तरी रिणां खातीर नेम, वेळापत्रक, फारीक करपाची पद्दत थारावप चुकीचें न्हय.
अर्थीक वेव्हार ही समाजांतली एक गरजेची प्रक्रिया. खंयच्याय वेव्हाराची बुन्याद परस्पर विस्वास, न्याय आनी जापसालदारकी अशा तीन खांब्यांचेर उबी आसता. पूण ही चौकट मोडपी म्हणल्यार पयशे मागुन घेवन परतून दिवापा वेळा फटवपी. ही वृत्ती अर्थीक, समाजीक, नैतीक मुल्यांचो अनादर, विस्वासघात करता. अशा मनशाचो समाजांत “नागोवणो ” अशा उतरांनी उल्लेख करतात. पूण हे सज्ञें भायर वचून ताचो परीणाम आनी समाजीक अर्थ समजून घेवप तितलेंच गरजेचें.
रीण घेवप वा रीण दिवप ही मनीस जिणेंतली पोरनी पद्दत. गरजेक लागून मनीस दुसऱ्यां कडल्यान मजत मागता आनी ती मजत चड करून विस्वासाचेर निंबून आसता. जेन्ना कोणाचो वेवसाय खंडीत जावन अर्थिक लुकसाणेन अचकित संकश्ट येता वा नोकरी वता तेन्ना कोणेय केल्ली अर्थीक मजत वखदा समा आसता.देखूनच रीण वा उधारी ही संकल्पना समाजांत रुढ जाल्या. पूण ही मजत समतोल दवरपा खातीर प्रामाणीकपण आनी दिल्ले उतरा प्रमाण वेळार पयशे फारिक करप ह्ये दोन नेमांक खुब म्हत्व आसता पूण जेन्ना ह्या नेमांक पाळो दिनात तेन्ना परिस्थिती इबाडूंक लागता. रीण घेवन ते बुडोवपी मनीस दुसऱ्यांच्या विस्वास घात करतात. सुरवेक गरजवंत मनिस गोड गोड उलोवन, अडचणींचें भांडवल करुन परिस्थितीचो फायदो घेवन पयशे एकठांय करता. पूण एकदां पयशे हातांत आयले उपरांत काळा प्रमाण फारीक करपाचें दिल्ल्या उतराक नेगार वतात फोन बंद दवरतात, मेळप टाळटात, कारणां सांगतात आनी केन्ना पडमुरे रीण दिवपी मनशाचें समाजांत नांव पिड्ड्यार करपाचो यत्न करतात तेन्ना उपकार करपी मनशाक खुब मानसीक त्रास सहन करचो पडटा. एके वटेन दिल्ले पयशे परत मेळचे नात हो हुस्को आनी दुसरे वटेन मूर्ख मनीस जावपाचो पश्चाताप, ह्यो दोनूय भावना मानसिक अस्वस्थताय निर्माण करतात. ह्या प्रवृत्तीचो सगळ्यांत व्हडलो दुश्परीणाम म्हळ्यार विस्वास. जेन्ना लोक नकारात्मक अणभवांतल्यान वतात तेन्ना फुडारांत मजत करपाक अनमनतात. “रिणार दिल्ले पयशे परत मेळचे नात” ह्या भंयान ते कोणाक अर्थिक मजत करनात. ताका लागून आधार करपाची परंपरा दुबळी जाता आनी समाज चड आत्मकेंद्रित, सुवार्थी जाता.खरें म्हणल्यार समाजांतले परस्पर विस्वासाचे धागे जरी अदृश्य आसले तरी अत्यंत म्हत्वाचे आसात. तातूंत एक बुराक जाल्यार पुराय बांदावळ कोसळपाचो धोको आसता. आयच्या संवसारांत अर्थीक शिस्त आनी पतपुरवठ्याचो इतिहास खूब म्हत्वाचो जाला. वेळार रीणां फारीक करपी मनीस चड विस्वासु मानतात, जाल्यार रिणां बुडवपी मनशाक फुडाराक कसलीच कायदेशीर अर्थीक मजत वा रीण मेळप कठीण जाताच वांगडा समाजांत त्या मनशाली प्रतिमा “नागोवणो मनीस” अशी जाता एकदां गेल्लो विस्वास परत मेळोवप भोव कठीण. पयशे परत करिनाशिल्ल्या मनशाचे मानसिकतेचे जायते थर आसात. कांय जाण खऱ्यांनीच संकश्टांत आसात पूण मागपाचें धाडस करीनात. कांय जाणांचे हेतू मात चुकीचे आसतात, ते रिणाक कायम स्वरूपी निधी मानतात. तांच्या उतरांत तांकां बांधिलकी दिसना. अशा लोकांक पयशांचें मोल वा दुसऱ्याच्या कश्टाची जाणविकाय आसना. हाचेर उपाय काडपाक जाय जाल्यार पयलीं गरज आसा ती पारदर्शकता आनी स्पश्टतायेची.
पयशांचो वेव्हार करतना भावना कुशीक दवरप म्हत्वाचें. तुमचे कडेन विस्वासांत घेवपा सारको संबंद आसलो तरी रिणां खातीर नेम, वेळापत्रक, फारीक करपाची पद्दत थारावप चुकीचें न्हय. पयशांच्या गजालीं विशीं स्पश्टपणान सांगल्यार गैरसमज जावपाची शक्यताय उणी जाता. तशेंच स्वताची प्रामाणीकताय सांबाळप आनी घेतिल्लें रीण जापसालदारकी म्हणून घेवप ह्यो मुळाव्यो मुल्यां दरेकल्यान आत्मसात करप गरजेचें. निमाणें पयशे घेवन परत करिनाशिल्लो मनीस फकत स्वताची प्रतिमेच न्हय तर पुराय समाजाचो विस्वास उणो करता. ताचे वर्तनांतल्यान खिणाक फायदो जावं शकता, पूण
दीर्घ काळांत ताका आनी हेरांचेंय लुकसाण जाता. कोणाचोय आदार घेवप म्हणल्यार ताचो विस्वास, ताणें कश्ट करून मेळिल्ली येणावळ आनी तो तुमचेर दवरता तो भरवसो. तिनूय गजालींक चड मोल आसात घेतिल्लें रीण फारिक केल्यारुच नात्यांतली गोडसाण, समाजांतलो सहकार, नैतीक मुल्यां तिगोवंन दवरूंक मेळटात. देखून खंयचेय परिस्थितींत रीणां वेळार फारीक करप ही फकत अर्थीक न्हय,
तर नैतीक आनी समाजीक जापसालदारकी.
—————————-
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
