भांगरभूंय | प्रतिनिधी
खूब ओरिजिनल नाटकां सर्तींत आशिल्लीं. हांवेंच चार पळेल्लीं. तांकां इनाम न दिवन कितें साध्य केलें तांकांच खबर. भाशेचो दुस्वास हें कारण आसूं येता.
म्हजें मत
कला अकादमीची 50 वी कोंकणी नाटकांची सर्त जाली. वर्सावळी प्रमाण कोंकणीचो गंध नाशिल्ले परिक्षक कला अकादमीन घाले. सदांच एक परीक्षक कोंकणी साहित्याची, भाशेची तशेंच संवसारीक कादंबरी, नाटकां हांची जाण आशिल्लो आसूंक जाय. तशें ना जातकच लेखनाचीं बक्षिसां ‘लिटररी व्हॅल्यू’ समजून घेवन कोणें थारावपाचीं? मराठी actors परिक्षकांनी? लेखनाचें पयलें इनाम कित्याक दिवंक ना? (एका तेंपार लेखनाचीं इनामां दिवपाक वेगळो परिक्षक नेमताले. साहित्य संमेलन, नाच महोत्सव हांचे सयत तेंवूय कला अकादमीन बंद केलां.) facebook poet जाल्ल्यांक काम कमी वा नासप हें बरेंच.
यु ट्युबान खूब गजाली सोंप्यो केल्यात. सोंपेपणी साहित्य चोरपाक. अमेरिकी लेखक स्टीफन किंग हांच्या Misery (1987) ह्या गाजिल्ल्या इंग्लीश कादंबरीचेर चित्रपट, नाटक आयलां. ताची जशाक तशी (देखाव, हालचाली, आड्ड्यो, मारफार) कॉपी मारून नाटक कोंकणी सर्तींत लेखकान (!) आपल्या नांवार खपयलें. आमी ही कादंबरी कॉलेजांत वाचिल्ली. कॉपीचे पुरावे, कादंबरीचे, चित्रपटाचे उतारे, संवाद, फिल्म गोंयभर व्हायरल जाल्लें. नाटक सुरू जायनाफुडें म्हाका misery फिल्म कोंकणीत पळेतां अशें दिसूंक लागलें. ही दैना पळोवं नजो जाली. कोंकणी नाटकाच्यो ह्यो भोयो, उदरगत आनी विदरणा पळोवन चुरचुरे दिसलें.
कला अकादमीच्या परिक्षकांक ह्या साहित्य चोरीचो अदमास आपली शब्दांची एलर्जी, वाचन नासप, हाका लागून कांयच कळ्ळोना. निमण्या दिसा निकाल दनपारां जाता. ऐन त्या वक्तार कागाळी येतकच धांवपळ. निकाल कळावान जालो. धा मिनटां फिल्म पळेल्यार पुरो. कथा, संदर्भ, पात्रां, विचित्रपणां काॅपी सगळें कळटा. Ditto. Psychological Horror अशें हे साहित्यकृतीक म्हणटात. तसलीं traumatic कथानकांचीं नाटकां भारतांत जावंकूच ना. कारण असल्यो कादंबऱ्यो, नाटकां, फिल्मां हे बाबतींत आमी कितले फाटीं आसात ignorant हें समजुपाक शंबर तरी इंग्लीश कादंबऱ्यो वाचच्यो पडटल्यो.
कागाळ येनाफुडें त्या बोवाळांत लेखनाचें पयलें इनाम कोणाकूच दिलेंना. तें कॉपी नाटक भायर उडयलें. खूब ओरिजिनल नाटकां सर्तींत आशिल्लीं. हांवेंच चार पळेल्लीं. तांकां इनाम न दिवन कितें साध्य केलें तांकांच खबर. भाशेचो दुस्वास हें कारण आसूं येता.
साहित्याची चोरी plagiarism हें कोंकणीत नवें न्हय. प्रकरणां खंयच्या थरार गाजल्यांत तें म्हाका डॅडीन सांगलां. पूण येद्या थरार मस्ती करता ताच्या धाडसाचें कवतूक दिसलें. सगळेच वेपार शांबळू जातकच असल्यांचें साधता. माजर हुंदरांक खावपाकूच विसरलां आनी घोरेता हें कळटकच हुंदीरमाम ताच्या तकलेर आंगार नाचूंक लागतात. ताका कडक आळो जायच. कारवाय जाय.
Myseryचो synopsis, कादंबरीचो सिनोप्सीस आनी चित्रपटाचे भाग mouse click चेर मेळटात. पळोवचे. हांव शेजारच्या राज्यांतल्यान हांगा येवन कांय टुरिस्टांवरी सेटल जावंक ना. कॉपी मारल्या म्हूण वायट दिसलें. आपलें मौलीक कितेंय जावं, जमता तशें मांडचें. तांची लक्तुबाय आऩी अपुरबाय दिसली.
50 व्या वर्सा सर्तीचें हेंच तें सार्थक? डॅडी कडेन हांवें हेंच discussion केलें. लेखन, डायरेक्शन सगळी कॉपी मारिल्लीं नाटकां सर्तींत सादर करपाचें धाडस कोणाक जावचें न्ही हो हुस्को जाला. म्हातारी मेल्ल्याचें दुख्ख ना. काळ सोकावता. कॉपी मारल्या हें समजुपाक खूब कादंबऱ्यो वाचच्यो पडटात. इंग्लीशींत आं. बडायो मारपाक कांयच लागना. सर्तीक, कला अकादमीक जें खत पडलां, जें लुकसाण जालां तें भरून येवचेंना. पन्नासावी सर्त ती. आमकां तरी याद उरतली. मडगांवच्यान येवन हें पळोवपाचें? हेडेक, ताप करून घेवपाक?
– रूपाली आजगांवकार
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
