भांगरभूंय | प्रतिनिधी
पृथ्वी वांटकुळी आसा. म्हणजे ताका अंत ना. तरी लेगीत कांय जाण मानतात एक रस्तो आसा जंय पृथ्वी सोंपता. तो निमाणो रस्तो. ह्या रस्त्याचें नांव ई-69.
युरोपी देश नॉर्वेंत हो रस्तो आसा. उत्तरी ध्रूव पृथ्वीचो सगळ्यांत निमाणो बिंदू. त्या बिंदूचेर पृथ्वीची धुरा घुंवता. हें नॉर्वेचें निमाणें पोत. थंयच्यान फुडें वचपी रस्तो हो संवसारांतलो निमाणो रस्तो अशें मानतात. थंयचो मुख्य म्हामार्ग सोंपले उपरांत फक्त ग्लेशियर आनी दर्या दिश्टी पडटा, ताचे भायर आनीक कांयच दिश्टी पडना.
ई-69 म्हामार्ग 14 किलोमिटर लांब आशा, जो पृथ्वीचें पोत आनी नॉर्वेक जोडटा. ह्या म्हामार्गाचेर अशे कितलेशेच वाठार आसा, जंय गाडी चलोवप आनी एकटो चलत वचपाक बंदी आसा. बंदी घालपा फाटलें कारण म्हणल्यार, एके वटेन झेलाचो व्हड थर आसा. ताका लागून थंयच्यान वचप घातक थारूं येता. ते भायर थंय शेणपाचो सदांच भंय आसता.
उत्तरी ध्रुवाच्या लागसार आशिल्ल्यान थंय शिंयाच्या मोसमांत रातीं सोंपून सोंपना आनी गिमाच्या मोसमांत सूर्य अस्तमेक वचना. केन्ना केन्ना थंय सुमार स म्हयने सूर्य दिश्टीच पडना. शिंयाच्या दिसांनी थंयचे तापमान मायनस 43 डिग्री ते मायनस 26 डिग्री सेल्सियस हाचे मदीं आसता. तेचवरी गिमाच्या दिसांनी तापमान सरासरी झिरो डिग्रीच्या लागीं आसता.
अजापाची गजाल म्हणल्यार इतलें शीं पडून लेगीत थंय लोक रावतात. पयलीं थंय नुस्तेमारी वेवसाय चलतालो. 1930 सावन थंय उदरगत जावपाक लागली. सुमार चार वर्सांनी म्हणल्यार 1934 त थंय लोकांनी मेळून निर्णय घेतलो, थंय पर्यटकांक येवकार दिवच, कारण तांचे येवणावळीचो एक मार्ग उक्तो जावचो.
आतां संवसारभरांतले लोक उत्तरी ध्रुवाचेर भोंवपाक येतात. थंय तांकां एका वेगळ्याच संवसारांत आशिल्ल्याचो अणभव मेळटा. थंय अस्तमपी सूर्य आनी पोलर लायटस जाल्यार वेगळ्याच संवसाराचो अणभव दिता. अस्तमपी सूर्य आनी पोलर लायटस पळयत रावनशें दिसता. अथांग निळ्या मळबांत केन्ना पाचवो जाल्यार केन्ना गुलाबी उजवाड पळोवपाक मेळटा. पोलर लायटीक ‘ऑरोरा’ अशेंय म्हणटात. थंय रातच्या वेळार लेगीत दिश्टी पडटा, जेन्ना मळबांत मात किट्ट काळोख आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
