भांगरभूंय | प्रतिनिधी
‘बेजीक’ ह्या संगणकाच्या भाशेचेर कांय जाणांनी काम करून ते आपल्या वापरांत हाडपाक लागिल्ले. बिल गेट्स तातुंतलोच एक आशिल्लो,
स्टीव जाॅब्स 1972 वर्सा हायस्कूल शिक्षण पुराय करून रीड नांवाच्या कला म्हाविद्यालयांत कॉलेजींत शिक्षण घेवपाक पॉर्टलॅंडाक गेलो. पूण थंयूंय बी स म्हयन्या उपरांत तो शिकपाक बेजारलो. जिणेंत कितें करचें हेंच ताका समजना जालें. ताणें कॉलेजांत वचपाचे बंद केलें, पूण पॉर्टलॅंड मात सोडलें ना. थंय ताणें डॅन कोट्क आनी रॉबर्ट फ्रायडलॅंड हे दोन घट्ट इश्ट जोडले. केन्नाकेन्नाय तांच्या वांगडा तर केन्नाय कोणूय भुरगो कॉलेज सोडून वतकच रिकाम्या जाल्ल्या डॉर्मेटरी रुमांत तो रावंक लागलो. मागीर तो बारीक-सारीक कामां करून लागींच्याच एका सवायशा भाड्याच्या कुडींत रावपाक लागलो. आनी फुकट जेवणां खातीर सात मैल चलून हरे रामाच्या देवळांत जावपी अन्नसत्राच्या शिवराक जेवणाक वतालो. केन्ना केन्नाय उपासूय करतालो ना जाल्यार मागीर दुदा वांगडा ओटमील खातालो. तेदे वेळारूच ताणें मांसाहारी जेवण-खाण सोडलें आनी तो जिवितभर शाकाहारी रावलो.
पॉर्टलॅन्डाक रीड कॉलेजांत शिकतना स्टीवाक आहार, झेन बौध्द धर्म, आनी सुलेखन (कॅलिग्राफी) हाची आवड निर्माण जाल्ली आनी ताका भारतांत ‘नीम करोली बाबा’ ह्या आध्यात्मीक गुरूक मेळपाची उमळशीक आशिल्ली. ताणें रीड कॉलेजांत फ्रायर रॉबर्ट पलाडिनो हाचें लागीं सुलेखन शिकपाक सुरवात केली. त्या शिक्षणाचो उपेग ताका उपरांत ॲपल संगणका खातीर जालो. आयज लेगीत ॲपलाचीं चिन्नां, जायराती, उत्पादनांत आनी पॅकेजींत ताचो प्रभाव आमकां दिसता.
रॉबर्टाच्या सोयऱ्यांची ऑरेगॉन हांगां सफरचंदाची बाग आशिल्ली, स्टीवाक ताच्या वांगडा थंय वचून सफरचंदाच्या बागेंत काम करपाक आवडटालें. भारतांत आध्यात्मीक गुरू नीम करोली बाबा भारतांत वचून तांकां मेळपाची स्टीवाक उमळशीक लागिल्ली. पूण ते खातीर ताका पयशे उबे करपाक जाय आशिल्ले. रोखडीच ‘अटारी’ ह्या गेमींग कंपनींत ताका जाय तसलें काम करपाची नोकरी मेळ्ळी. थंय कामां खातीर कंपनींन ताका जर्मनींत धाडलो. अमेरिके सावन वचचें परस जर्मनी सावन भारतांत वचप ताका परवडपा सारखें आशिल्लें. ताणें जर्मनींतलें आपलें काम सोंपोवन भायले भायर भारतांत वचपाचो बेत केलो. ताणे आपलो इश्ट डॅन कोटक हाकाय बी आपल्या वांगडा आपयलें. भारतांत ते दोगूय गुरु नीम करोली बाबांक मेळपाक आश्रमांत गेले. तेन्ना तांच्या गुरुचे फाटल्याच वर्सा महानिर्वाण जालें हें तांकां समजलें. तांचो निरस जालो आनी ते रोखडेच अमेरिकेक परतले.
कॅलिफोर्नियाक एका मोनेस्ट्रींत झेन गुरु कोबून चिनो ओटोगावा हांचे लागीं तो अध्यात्मीक मार्गदर्शन घेवंक लागलो. ताका सगळें सोडून जपानांत मोनेस्ट्रींत वचून अध्यात्मीक मार्गान जगन दिसतालें. पूण ताच्या झेन गुरू कोबून चिनो ओटोगावान ताका तशें करनाका म्हूण सल्लो दिलो. घडये ताच्या हातान संगणक मळार व्हड काम जावपाचें आसा हाची तांकां सुलूस लागिल्ली आसत.
ॲपलाच्यो बियो रुजल्यो
1975 त स्टीव जेन्ना पंचवीस वर्सांचो आशिल्लो तेन्ना नोकरी करपाक तो अटारींत परतलो. थंय परत ताचो इश्ट स्टीव वॉझ ताका मेळ्ळो, जो संगणक तयार करपाच्या सोदांत आशिल्लो. मायक्रो प्रॉसेसर तेन्ना नवोच बाजारांत आयिल्लो. कॅलिफॉर्नियाच्या उमेदी लोकांनी होमब्रीव कंप्युटर क्लब केल्लो. वॉझ तांकां संगणकाक लागपी प्रिन्टेट सर्कीट बॉर्ड तयार करून विकपाक लागलो. वॉझा वांगडा संगणक तयार करपाच्या व्यवसायाचो विचार स्टीवाच्या मनांत केन्ना सावन घोळत आशिल्लो.
1976 वर्साच्या फेब्रेर म्हयन्यांत ताणें वॉझाक ते खातीर विचारलें. “तातूंत घाल्ले आमचे पयशे बुडले जाल्यार लेगीत जिणेंत एक फावट स्वताची कंपनी काडिल्ल्याचें सामाधान आमकां आसतलें” अशेंय स्टीवान ताका सांगलें. दोगूय इश्टांनी मेळून बराबरीच्या भागिदारीन आपली अशी कंपनी काडली आनी स्टीवान ताचें नांव दवरपाचें थारायलें ‘ॲपल’.
‘ॲपल’ हें नाव स्टीवाक आवडपाक घडये दोन कारणां आशिल्लीं. एक म्हणल्यार ताका आपलो इश्ट रॉबर्ट फ्राइडलॅन्ड हाच्या वांगडा सफरचंदाच्या बागेंत काम करपाक आवडटालें आनी दुसरें म्हणल्यार पयलीं ताणें जायते फावट फकत सफरचंदा खावन दीस काडिल्ले. ‘ॲपल’ हें नांव वॉझाक बरें पसंत पडलें नाशिल्लें. पूण बरें मना सारके नांव मेळ्ळें ना तेन्ना ‘ॲपल’ हेंच नांव दवरपाचें तांणी थारायलें.
ॲपल-1 संगणकाचें निर्मिती कार्य
सुरवातेक प्रिन्टेड सर्किटबोर्डच करपाचें काम तांणी हातांत घेतलें. भांडवल उबारपाक स्टीवान आपली पोन्नी वॉक्सवॅगन गाडी आनी वॉझान आपलो ‘हॅवलेट पॅकर्ड 65’ कॅलक्युलेटर विकलो. दोगूय स्टीवांक वेवसायाचो अणभव नाशिल्ल्यान, ‘रॉन वेयन’ नांवाचो एक अणभवी भागिदार घेवपाचो निर्णय स्टीवान घेतलो. दोगूय स्टिवाचो 45- 45 टक्के आनी रॉनाचे 10 टक्के अशी भागिदारी दवरून धंदो सुरू करपाचें थारलें. आनी 1976 ह्या वर्सा 1 एप्रिलाक म्हणल्यार एप्रील फुलाच्या दिसा तिगांयनीय रॉन वेयनाच्या मावंटन व्हीव अपार्टमेन्टांत धंद्याच्या कराराचेर सय केल्यो. पूण अकराच दिसांनी रॉन वेयनान तातूंतल्यान फाटीं सरपाचो निर्णय घेतलो जो सगळ्यांत मुर्खपणाचो निर्णय आशिल्लो हें फुडें वचून साबीत जालें.
पुराय ॲसेंबल केल्लो कंप्युटर तयार करून दितात जाल्यार पन्नास संगणक विकत घेवपाची तयारी ‘टॅरेल’ नांवाच्या संगणक वेवसायिकान दाखयली. स्टीवान तें मान्य केलें आनी अशे तरेन पाचशें डॉलरांत एक कंप्युटर ह्या हिशोबान पन्नास संगणकाची पयलीच ऑर्डर तांकां मेळ्ळी.
ॲपल कंप्युटर्सांचे ऑफीस नाशिल्लें, ना कामगार. पूण आपली कंपनी वेवसायीक दिसपाक लागून स्टीवान थंय टेलिफोन आन्सरींग सेवा घेतिल्ली. थंय फोन येताले ते स्टीवाची आवय क्लॅरा घेवन गिरायकाक जाय ती म्हायती दिताली. भायले गॅरेजींत स्टीव वॉझ आनी स्टीव जॉब्स संगणकाची बांदावळ करताले आनी रातभर चालू दवरून ते सारके चलतात काय नात तें तपासून पळयताले. स्टीवाच्या घरचीं, इश्ट डॅन आनी ताची घरकान्न एलिझाबेथ, आपापले तरेन तांकां मजत करपाक लागलीं.
तांकां ते कंप्युटर चलोवपाक सॉफ्टवॅराची गरज आशिल्ली. ‘बेजीक’ ह्या संगणकाच्या भाशेचेर कांय जाणांनी काम करून ते आपल्या वापरांत हाडपाक लागिल्ले. बिल गेट्स तातुंतलोच एक आशिल्लो, जो तेन्ना मायक्रोसोफ्ट कंपनी काडपाच्या तयारेंत आशिल्लो. वॉझान तीच भाशा आपल्या संगणकाक वापरपाचें थारायलें, जाका बिल गेट्सान आक्षेप घेतलो. तरी लेगीत वॉझान आपलें काम चालू दवरलें. तेन्ना संगणकांक कसलीय म्हायती वा सुचना भितर उरपाची सोय नाशिल्ली. संगणक बंद करतालीं तेन्ना सगळो डॅटा ना जातालो. वॉझान तकली वापरून, कॅसेटीर तो सगळो डॅटा सांठोवन वापरपाक सुरवात केली. आनी अशे तरेन ॲपल-1 चे 50 संगणक तयार करून टेरेलाच्या ‘बायट’ ह्या दुकानाचेर पावयले. पाचशें डॉलर दरान एक संगणक घेवन टेरेलान ताचो किरकोळ दर 666 डॉलर दवरलो. आनी ॲपल कंप्युटर्स कंपनीची संगणक विक्री सुरू जाली.
मंजुषा सिनाय तळावलीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
