भांगरभूंय | प्रतिनिधी
विधीमंडळा कडल्यान मत मांडपाक सात दिसांचो वेळ
मुंबय ः शिंदे- फडणवीस सरकारांत आयले उपरांत अजीत पवारा सयत राष्ट्रवादीच्या णव आमदारांक मुख्यमंत्री एकनाथ शिंदे हांच्या फुडारपणा खाला शिवसेना आमदारांत अस्वस्थताय निर्माण जाल्या. तातूंतले कांय जाण ठाकरे गटाच्या संपर्कांत आसात अशें खासदार संजय राऊत हांणी शुक्रारा जाहीर केल्लें. शेनवारा महाराष्ट्र विधानसभेचे अध्यक्ष राहुल नार्वेकरान शिंदे गटांतले 40 आनी ठाकरे गटांतले 14 आमदार मेळोन 54 आमदारांक अपात्रताये विशीं आपलें मत मांडपा खातीर नोटीस जारी केल्या.
शिवसेना शिंदे गटांतल्या 16 आमदारांक अपात्र थारावपा विशीं विधानसभा अध्यक्ष राहुल नार्वेकार बेगीनूच निर्णय घेतले. तातूंतल्या 54 आमदारांक आतां विधीमंडळा कडल्यान नोटीस जारी करतना आपले मत मांडपाक सात दिसांचो वेळ दिला. अपात्रताये आड कारवाय जावची न्हय हे खातीर आमदारांक सगले पुरावे सादर करचे पडटले. शिवसेनेच्या संविधानाची प्रत वेंचणूक आयोगा कडल्यान विधीमंडळाक मेळ्ळ्या. शिवसेनेच्या संविधानाचो अभ्यास करून विधानसभा अध्यक्ष राहुल नार्वेकर रोखडोच निर्णय घेवपाची शक्यताय आसा.
मुख्यमंत्री शिंदे सयत 16 आमदारांक अपात्र करपा खातीर ठाकरे गटाची याचिका विधानसभेच्या अध्यक्षा कडेन सादर केल्या. हे खातीर ठाकरे पंगडान खूबदां उगडासपत्रां दिल्यांत. आमदारांक अपात्र थारपा संबंदी विधानसभा अध्यक्षान निर्णय घेवचो असो निर्देश सर्वोच्च न्यायालयान दिला. हाका लागून नार्वेकार आतां एकनाथ शिंदे आनी हेर आमदारांचेर नोटीस दिवन कारवाय सुरू करपाचे आसात. सर्वोच्च न्यायालयाच्या निकाला उपरांत विधानसभा अध्यक्षाक निर्णय घेवपाक 90 दिसांचो वेळ दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
