भांगरभूंय | प्रतिनिधी
पणजी: दिव्याज फावंडेशन आनी भामला फावंडेशनाच्या फुडाकारान गोंय सरकारा वतीन ‘क्लीनथॉन’ मोहिमेचें आयोजन केलां. हाचें उक्तावण मिरामार दर्यादेगेर 28वेर सकाळीं 7.30 वरांचेर मुख्यमंत्री डॉ. प्रमोद सावंत आनी केंद्रीय म्हायती आनी प्रसारण मंत्री अनुराग ठाकूर हांचे हस्तुकीं जातलें अशी म्हायती पणजी म्हापालिकेचे आयुक्त आग्नेलो फर्नांडीस हांणी दिली.
ह्या वेळार पत्रकार परिशदेंत पणजी म्हापालिकेचे म्हापौर रोहीत मोंसेरात, आयुक्त आग्नेलो फर्नांडीस आनी भामला फावंडेशनाचे संस्थापक आसीफ भामला हाजीर आशिल्ले.
क्लीनथॉन मोहिमेंत विशेश उपस्थितींत ज्येश्ठ संगीतकार ए. आर. रहमान, नृत्य दिग्दर्शक रेमो डिसोझा, अभिनेतो जॅकी श्रॉफ, अभिनेत्री शहनाज गील, अभिनेतो अर्शद वारसी, अभिनेतो करण कुंद्रा, अमृता फडणवीस हांची हाजेरी आसतली. मजगतीं विवीध सिनेकालाकारूय हाजेरी लायतले.
अमृता देवेंद्र फडणवीस हांणी स्थापन केल्ल्या दिव्याज फावंडेशन आनी भामला फावंडेशन इंटरनॅशनल फिल्म फेस्टिव्हल ऑफ इंडिया हांच्या पालवान गोंय सरकार दर्यो नितळ मोहिमेचें आयोजन करता. खूबशे जाण ह्या हरीत यत्नाचो चेरो आसात, आनी आमकां खात्री आसा की ही मोहीम तरणाट्यां मदीं पर्यावरण संवर्धना खातीर अदीक जागृताय आनी गांभीर्य निर्माण करतली अशी प्रतिक्रिया फर्नांडीस हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
