भांगरभूंय | प्रतिनिधी
भांगरभूंय । प्रतिनिधी
मडगांवः वीज पुरवण यंत्रणेंत सुदारणा करपा खातीर 2019 तें 2022 मजगतीं 12 हजार कोटी रुपये खर्च करून लेगीत गिरायकांक अखंडीत वीज पुरवण करपाक सरकाराक सामकें अपेस आयलां. वीज वितरण लुकसाण भरून काडपा खातीर थकबाकी आशिल्ल्यां कडल्यान ती वसून करून घेवपाक लेगीत सरकार अपेशी थारलां. अशे परिस्थितींत वीज दरवाड करून गिरायकांचेर वजें घालपाचो सरकाराक कसलोच अधिकार ना अशें विरोधी पक्ष फुडारी युरी आलेमांव हाणे सांगलां.
वीज खात्यान जोड विद्युत नियामक आयोगा सामकार (जेईआरसी) वीज दरांत सुमार 7 तें 14 टक्के वाड करपाचो प्रस्ताव दवोरला. ताचेर प्रतिक्रिया उक्तायतना सेगीत तिसऱ्या वर्सा वीज दरवाड करपापो निर्णय घेतिल्ले खातीर सरकाराचेर टिका केली. विधानसभेंत सरकारान दिल्ले म्हायती प्रमाण गोंयांत 3,480 वीज बिल थकबाकीदार आसात. तातूंत 1 लाखा परस चड रक्कमेचे थकबाकीदार आसात. गोंय सरकाराचींच 2,669 कार्यालयां थकबाकीदार आसात. उद्देगीक मळार सुमार एक हजार आनी 13,081 वेवसायीक आस्थापनां थकबाकीदार आसात.
गॅरिसन अभियंता, मिलिटरी डेंन्टल सेंटर हाणी 2016 सावन 53.03 लाख, कार्यकारी अभियंतो विभाग 8 एमआरटी हांचे कडल्यान 2.55 कोटी थकबाकी आसा. तशेंच बांदकाम खातें, पणजी म्हानगरपालिका, खेळां खातें आनी हेर सरकारी कार्यालयां कडल्यान कोट्यांनी रुपये थकबाकी येवपाची आसा हें सामकार आयलां. थकबाकीदारां मदीं वीज खात्याचीच वीज वापर शुल्का तल्यान सरकाराक 15.49 लाख रुपये येणे आसात हे युरी आलेमांव हाणे नदरेक हाडून दिला.
गोंयातली वीज पुरवण यंत्रणेंत सुदारणा घडोवन हाडपा खातीर सरकारान प्राधान्य दिवपाक जाय. वीज मंत्री सुदिन ढवळीकार हाणे फाटल्या चार वर्सांत केल्ल्या 12 हजार कोटी रुपया खर्चाची चवकशी करची तशेंच थकबाकीदारां कडल्यान चड करून कारखाने आनी आस्थापनां कडल्यान कोट्यांनी रुपयांची थकबाकी वसुली करपाचें कालबद्ध लक्ष्य थारोवपाक जाय. उद्देगीक आस्थापनांक करतात ती विजेची चोरी बंद करपा खातीर खर पावलां घालपाक जाय अशें आलेमांव हाणे सांगलें. म्हारगाय आनी बेरोजगारीक लागून दिसपट्टयो गरजो पुराय करपा खातीर धडपडपी साबार लोकांचेर वीज दरवाडीचें वजे घालप अन्यायाचें थारतलें. ताका लागून वीज दरवाड प्रस्ताव फाटीं घेवचो अशें ताणे सांगलां. जेईआरसी सामकार आपूण वीज दरवाडीक आक्षेप घेतलो अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
