भांगरभूंय | प्रतिनिधी
घाणाक दवरिल्ली मालमत्ता विकली
बेतकेच्या शांती अॅग्रो उद्देगाच्या संचालकां आड गुन्यांव
पणजी: बँके कडेन घाणाक दवरिल्ल्या कारखान्या सयत 5000 चौखण मिटर जमनीची विक्री करून बँकेक सुमार 10 कोटी रुपयांक तोपी घाल्ल्याचें मुखार आयलां. ह्या प्रकरणांत गोंय पुलिसांच्या अर्थीक गुन्यांव विभागान (ईओसी) बेतकी फोंडें हांगासरल्या शांती अॅग्रो उद्देगाच्या संचालका सयत ती जमीन खरेदी करपी व्यक्ती मेळून पाच जाणां आड गुन्यांव दाखल केला.
गोंय पुलिसांच्या अर्थीक गुन्यांव विभागान दिल्ले म्हायती प्रमाण ह्या प्रकरणांत कॅनरा बँकेचे वेवस्थापक नागेश्वर बिक्षापती हांणी कागाळ दाखल केल्या. ते प्रमाण बेतकी फोंड्यां शांती अॅग्रो उद्देगाचे संचालक शांती सुरेंद्र कामत, आरबेत्तु कामत आनी भागिदार आशीष सुरेंद्र कामत आनी मैत्री सुरेंद्र कामत हांणी सप्टेंबर 2017 ते जून 2020 या काळांत बेतकी-फोंड्यां सर्वे क्रमांक 22 मदल्या कारखान्या सयत 5000 चौखण मिटर जमीन घाणाक दवरून कॅनरा बँके कडल्यान 10.80 कोटी रुपयांचें रीण घेतिल्लें.
उपरांत दुबावितांनी रिणाचे हप्ते फारिकूच केले नात. ह्याच वेळार दुबावितांनी 5 जानेवारी 2022 दिसा कंपनीची वयली मालमत्ता भानुदास वझे हांकां विकली. उपरांतूय दुबावितांनी बँकेचें रीण फारीक केलें ना. त्या वेळार दुबावीत बँकेक 9.32 कोटी रुपया देणे बाकी आशिल्ले. बँकेन उपरांत वयल्या पांच दुबावितां आड बँकेची फटवणूक केल्ल्या प्रकरणांत ईओसी कडेन कागाळ दाखल केली.
हाची दखल घेवन विभागाचे पुलीस निरिक्षक रमेश शिरोडकार हांच्या मार्गदर्शना खाला उपनिरिक्षक पराग पारेख हांणी वयल्या पांच दुबावितां आड भादंसं च्या कलम 406, 420 आनी 120 बी खाला गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
