हणजूण कोमुनिदाद कोट्यधीश
भांगरभूंय | प्रतिनिधी
सनबर्न महोत्सव आयोजकांनी विवीध शुल्क मेळून ३.२८ कोटी केले एकठांय
म्हापशें, प्रतिनिधी : हणजूणच्या एका थळाव्यान सनबर्न आयोजकांनी हणजूण कोमुनिदाद कडेन जमीन वापरपा खातीर २.४३ कोटी रुपया भाडें भरूंक नाशिल्ल्यान हो महोत्सव बंद करचो अशी मागणी करपी याचिका मुंबय उच्च न्यायालयाच्या गोंय खंडपीठात दाखल केल्ली. ह्या प्रकरणाची आयज सुनावणी जाली. ह्या वेळार सनबर्न महोत्सव आयोजकांनी विवीध शुल्क मेळून ३.२८ कोटी एकठांय केल्ल्याची म्हायती खंडपीठांत दिली.
हणजूण कोमुनिदाद कोट्यधीश
फाटल्या कितल्याशाच वर्सां सावन हणजूण कोमुनिदादीच्या जाग्यार सनबर्न जाता. इतलीं वर्सां जालीं ह्या महोत्सवाचें हांगा आयोजन करून लेगीत कोमुनिदादीचे तिजोरेंत कांयच उत्पन्न पडूंक ना. पयलीं २.४३ कोटींची थकबाकी भरची आनी मागीरूच तुमचो सनबर्न करचो अशें सांगून न्यायालयांत गेल्या उपरांत आयोजकांक नमतें घेवचें पडलें. हातूंत एकट्या कोमुनिदादीक वट्ट २ कोटींचो फायदो जालो.
सनबर्न महोत्सव आयोजकांनी विवीध शुल्क मेळून ३.२८ कोटी एकठांय केल्यात. हातुंतले २.४३ कोटी रुपया हणजुणे कोमुनिदीक, ३६ लाख नागरी प्रशासन, ४८ लाख कोमुनिदाद प्रशासनाक वांटून वतले. तशेंच सनबर्नाचे वट्ट फींत कोमुनिदाद, कोमुनिदाद प्रशासन, जिल्हो प्रशासन, पर्यटन खातें, प्रदूशण नियंत्रण मंडळ, पुलीस,उजो पालोवपी दळ, जीसीझेडएमए, अबकारी खातें हांचोय आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
