भांगरभूंय | प्रतिनिधी
भांगरभूंय । प्रतिनिधी
सांगें : पुराय संवसारार फामाद आशिल्लो दुदसागर घसघसो पळोवपा खातीर आयज सकाळीं हजारांनी पर्यटक रेल्वेस्टेशनाचेर दाखल जाल्ले. घसघश्याचेर वचपाक बंदी आशिल्ल्यान गोंयांत प्रवेश केल्ल्या सगळ्या पर्यटकांक रेल्वे पुलिसांनी आडायल्यात. ताका लागून दनपार मेरेन सगळे पर्यटक रेल्वेच्या रुळार येवन राविल्ले. ह्या रुळा वेल्यान यो- वच करपी रेल्वेक आडखळ निर्माण जावपाची शक्यताय आशिल्ली. मात दनपार मेरेन तातूंतले बरेच पर्यटक घरा परतले. काल पसून अशीच गर्दी जाल्ली.
सकाळीं गोंयांत प्रवेश करपी यशवंतपूर आनी निझामुद्दीन ह्या रेल्वेंतल्यान हजारांनी पर्यटक दूदसागर रेल्वे स्टेशनार आयले. हांगाच्या रेल्वे पुलिसांनी तांकां धांवडायिल्ल्यान ते दुदसागर ते कुळें मेरेन चलत गेले. दुदसागराचेर वचपाक बंदी घातिल्ल्याची म्हायती नाशिल्ल्यान तिडकल्ल्या पर्यटकांनी बोवाळ घालो. घरां परतूपाक तांणी रेल्वेच्या रुळार गर्दी केल्ली. दूदसागर घसघश्याचेर वचपाक बंदी घाल्या, हाची शेजारच्या राज्यांनी जायरात करची, अशी मागणी कांय सैममोगींनी केल्या. कारण हांगा येवपाक पर्यटकांचो वेळ आनी पयसो फुकट वता, अशेंय तांणी सांगलें.
दूदसागराचेर काल आनी आयज अक्षरशा हजारांनी लोकांची गर्दी. घसघश्याचेर वचपाक बंदी घाल्या. मजगतीं, रेल्वे रुळा वयल्यान वा कुशीकच्यान चलप धोकादायक थारूं येता. रेल्वे कायद्या खाला हो गुन्यांव, अशें रेल्वेन कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
