भांगरभूंय | प्रतिनिधी
सर्गेस्त पर्रीकार हांचेर सगळ्यांत चड रक्कम खर्च
भांगरभूंय । लौकीक शिलकार
पणजी ः फाटल्या स वर्सांत गोंय विधानसभेच्या आदल्या 88 आमदारांक वैजकी उपचारा खातीर विधानसभेच्या येवजणेचो फायदो जाला. फकत आमदारांकच न्हय तर तांच्या कुटुंबांकय वैजकी उपचारा खातीर फायदो मेळटा. आदले आमदार, ताची बायल वा हेर कुटुंबांतल्या वांगड्याच्या वैजकी उपचारा खातीर सरकारान 15 कोटी रुपया खर्च केल्यात.
राज्यांत सामान्य लोकां खातीर दीनदयाळ भलायकी सेवा येवजण आसा. पूण विधीमंडळांतल्या वांगड्यांक खासा वैजकी उपचाराची येवजण आसा. आदले मुख्यमंत्री मनोहर पर्रीकार हांकां हे येवजणेच्या इतिहासांत आतां मेरेन सगळ्यांत चड रक्कम मेळ्ळ्या. तांच्या उपचारा खातीर सुमार पावणे स कोटी रुपया खर्च जाले.
आदले उपमुख्यमंत्री फ्रांसिस डिसोझा हांच्या उपचारा खातीर 2 कोटी 36 लाख रुपया खर्च जाले जाल्यार तिसरें सगळ्यांत चड बिल 81 लाख 30 हजार रुपयांचें विष्णु वाघ हांच्या उपचारा खातीर जालें.
आदले आमदार कार्लोस आल्मेदा सुमार 50 लाख रुपया, पांडुरंग मडकयकार हांचेर 50 लाख रुपया खर्च जालो. आदले सहकार मंत्री सोमनाथ जुवारकार हांकां सरकारान 37.45 लाख रुपयांचीं बिलां फारीक केल्यात जाल्यार आदले मुख्यमंत्री चर्चिल आलेमाव हांकां 2020 वर्सा 12.50 लाख रुपया वैजकी खर्च केला.
आदले आमदार बेंजामिन सिल्वान सुमार 40 लाख खर्चाची बिलां दिल्यांत. विशेश गजाल म्हळ्यार जायत्या आदल्या आमदारांनी आनी तांच्या कुटुंबान नेमान सुरु आशिल्ल्या उपचाराची बिलां फाटल्या कांय वर्सांत दिल्यांत. आदले आमदार कायतान सिल्वा हांकां 10 लाख वैजकी खर्च केला, तशेंच आदले उपमुख्यमंत्री दयानंद नार्वेकार 21 लाख, आदले मंत्री दिलीप परुळेकार 10 लाख, फातिमा डिसा सुमार 11.70 लाख, अण्णा झांट्ये सुमार 8 लाखाचे बिल आशिल्लें. नरेश सावळ हांच्या उपचाराचे सुमार 14 लाख रुपयाचे बिलाक मान्यताय मेळ्ळ्या. हसन हरुण शेखान 30 लाख रुपया खर्च केला.
आमदारांक वैजकी खर्च, विधानसभा अधिवेशनांत हाजिरी भत्तो, वाहन खरेदी खातीर 15 लाख रुपया मेरेन एडवान्स आनी घर खरेदी खातीर 30 लाख रुपया मेरेन एडवान्स मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
