भांगरभूंय | प्रतिनिधी
मडगाव : सोनसड्यांतल्या कोयराची समस्या सोडोवपा खातीर मडगांव नगरपालिके कडल्यान यत्न सुरू आसात. आमदार विजय सरदेसाय हांणी उंचेल्या पांवड्यावेले बसकेंत जायते प्रस्न मांडले. घाणयाऱ्या उदकाचो प्रस्न सोडोवंक नाशिल्ल्यान पावसाच्या उदका वांगडा हें घाणयारें काळें उदक कोयराच्या राशींतल्यान मनशाच्या वसणुके कडेन व्हांवता. हाचो भलायकेचेर व्हड परिणाम जावपाची शक्यताय आसा.
सोनसड्यांतले प्रस्न अजूनय तिगून उरता अशें दिसता. मुख्यमंत्री डॉ. प्रमोद सावंत हांणी मडगांवच्या नगराध्यक्षांचे हाजिरेंत फातोर्डा, कुडतरी आमदारां सयत उंचेल्या पांवड्यार बसका घेतली. हे बसकेंत जायत्या विशयांचेर चर्चा जाली. ते प्रमाण कोयराची समस्या सोडोवपाचे यत्न सुरू आसात.
कामगारांची संख्या उणी आशिल्ल्यान हालींच जाल्ले बसकेंत कामगारांची नेमणूक करपाचो निर्णय घेतला. पूण दर दिसा मेळपी कोयराची अजूनय प्रक्रिया जायना. हाचे भायर शेडाच्यो दोन बाजूच्यो वण्टी कोसळ्ळ्यात आनी पावसाचें उदक शेडांत वचत आसा. हेर सुवात मेळनाशिल्ल्यान दिसपट्टो कोयर त्याच शेडांत उडयतात.
हें उदक पावसाच्या उदकांत भरसता आनी लागसारच्या इमारतींच्या लागींच्यान घाणयारें उदक गटारांत आनी मनशाच्या वसणुकेंतल्यान फुडें शेतकी जमनींत वता. फातोर्डा वाठारांतल्या बांयचें उदक ह्या उदकाक लागून हळडुवें जाल्ले. देखून आतां पावसाच्या दिसांनी ह्या उदकाक लागून महामारी दुयेंस पातळपाची भिरांत निर्माण जाल्या. हाचे भायर सोनसोड्यांतलो कोयर मनशाच्या रावपाच्या जाग्यार पावला अशेंय दिसता. हाचेर बेगोबेग कारवाय करपाची मागणी आसा.
जाग्याचो प्रस्न कायम
न्यायालयाच्या आदेशा उपरांत मडगांव नगरपालिकेन सोनसडोतल्या कोयराच्या राशीचेर सुदारणा करपाचेर भर दिला. आतां सुदारणा केल्या उपरांत कर्नाटकांतल्या कंपनींक कोयर धाडपाक लागल्यात. शेड दोन वटांनी पडिल्ली आसली तरी तातूंत कोयर उडयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
