सैममोग्यांचें धरणें आंदोलन सुरूच

भांगरभूंय | प्रतिनिधी

विंगड विंगड संस्थांचो आयआयटी विरोधकांक तेंको

सांगेंः 43 दीस जाले आयआयटी विरोधांत सैममोगी आनी शेतकार धरणें आंदोलनाक बसल्यात आनी दिसान दीस तांकां गोंयच्या विंगड विंगड संस्थांचो आनी सैममोग्यांचो तेंको मेळत आसा. सैम पेड्डेर करून आयआयटी कित्याक? गोंयकारां खातीर कांय गोंया भायल्या लोकां खातीर? कोट्यांनी रुपया खर्च करून हो प्रकल्प कोणाच्या फायद्या खातीर असो प्रस्न सैम मोगी करतात.

सरकाराच्या म्हणण्या प्रमाण हो प्रकल्प मेळावली सारक्या गांवांत नाका आशिल्लो काय कितें? काणकोणच्यान हो प्रकल्प धांवडावन घालो, जाल्यार सांग्यां वेल्यान धांवडायिल्लो प्रकल्प परतून हाडप कोणाच्या फायद्या खातीर, असो प्रश्न सैम मोगी करतात.

साळावलेच्या धरणां खातीर ज्या लोकांनी आपल्या जमनीचो त्याग केलो तांकां न्याय दिवपाक सरकाराक अपेस आयलां. आनी आयज लोकांची दिशाभूल करून, सैममोग्यां कडेन फटींगपणां करून दोंगर, सैम मातयेभरवण करून आयआयटी कोणाक जाय असो प्रस्न सैममोगी करतात. कालचो दीस धरून 43 दीस जाले सैममोगी धरणें आंदोलनाक बसल्यात हाचें सरकाराक वा थळाव्या आमदाराक पडिल्लें ना अशें सैममोगी म्हणटात.

ह्या आदोलनाक तेंको दितना शंकर पोळशी हांणी म्हणलें, सैम पेड्डेर करून आयआयटी हाडपाक फुडें सरिल्ल्या सरकाराचो आनी थळाव्या आमदाराचो आमी निशेध करतात. सरकाराचो हो निर्णय चुकिचो आसा. मनशाक जसो हे धर्तरेर रावपाचो अधिकार आसा तसो जनावरांकूय आसा. सैम पेड्डेर केलो, दोंगर कापले जाल्यार जनावरां खंय वतलीं? जो मेरेन सरकार आपलो निर्णय फाटीं घेना तो मेरेन आयआयटी विरोधकांक आमचो तेंको आसतलो अशें पोळशी हांणी म्हणलें.

महेश नायक हांणी म्हणलें, आयआयटी आयली जाल्यार गांवांत वायटी लागली. वायटी आनी आयआयटी सारकीच. हांगासरल्या राजकारण्यांक गोंयचें लोक काबार जाल्ले जाय. लोकांक जाय तशें सरकारान करपाक जाय. आयज ह्या सरकारान 26 हजार कोटी रीण काडलां. गोंय हें आमच्या गोंयकारांचें. गोंयकारांक जाय तशेंच सरकारान वा थळाव्या आमदारान करपाक जाय. गांवच्या लोकांक उपेगी नाशिल्ल्या प्रकल्पाक आमचो सदांच विरोध आसतलो अशें नायक हांणी म्हणलें.

आमी आमच्या हक्का खातीर झगडटात, सैमा खातीर झगडटात, आमचो लढो जो मेरेन आयआयटी वचना तो मेरेन चालूच उरतलो अशें मिल्टन फर्नांडीसान म्हणलें.

ह्या वेळार अॅंथनी डिसिल्वा हांचेंय उलोवप जालें.