भांगरभूंय | प्रतिनिधी
येवजणेचो काळ फुडलीं तीन वर्सां
पणजी ः सुदारीत मुख्यमंत्री रोजगार येवजणा (सीएमआरवाय) 1 एप्रील सावन लागू जातली. येवजणेचो काळ फुडल्या तीन वर्सां खातीर म्हळ्यार 31 मार्च 2026 मेरेन आसतलो. हे संबंदी अर्थ खात्यान अधिसुचोवणी जारी केल्या.
स्वरोजगार सुरू करपा खातीर राज्यांतल्या तरणाट्यांक अर्थीक मजत दिवपाच्या हेतान अर्थीक उदरगत म्हामंडळा वरवीं राज्य सरकारान मुख्यमंत्री रोजगार येवजण सुरू केल्या. फाटल्या कांय वर्सांत राज्यांतल्या बऱ्याच तरणाट्यांनी हे येवजणेचो फायदो घेवन स्वताचो वेवसाय सुरू केलो. ‘आत्मनिर्भर भारत – स्वयंपुर्ण गोंय’ मोहीम सुरू केल्या उपरांत ही येवजण चडांत चड तरणाट्यां मेरेन पावपा खातीर सरकारान प्राधान्य दिल्लें. हे येवजणेचो सगळ्यांक फायदो जावचो हे खातीर सरकारान फाटल्या म्हयन्यांत येवजणेंत कांय म्हत्वाचीं दुरुस्त्यो करून सुदारीत येवजणेची अधिसुचोवणी जारी केल्या. सुदारीत येवजणेचो लाव लावार्थ्यांक 1 एप्रील सावन फुडल्या तीन वर्सां मेरेन घेवपाक मेळटलो.
पयलीं 10 लाखां मेरेन वर्सुकी येणावळ आशिल्ल्यांकच हे येवजणेचो फायदो मेळटालो. पूण, आतां येवजणेंत धा लाखांच्या उत्पन्नाची अट आसची ना. वर्सुकी उत्पन्न कितलेंय आसलें तरीय येवजणेचो फायदो घेवप शक्य जातलें. पयलीं पिराय मर्यादा 18 वर्सां वयल्यान 45 वर्सां मेरेन आशिल्ली, आतां चडांत चड पिराय मर्यादा 50 वर्सां मेरेन वाडयल्या. सुदारीत येवजणे प्रमाण हे येवजणेंत 2 टक्के व्याजाचेर 20 लाखां मेरेन रीण मेळपाची तरतूद आसा. वेवसाया खातीर रिणाची मर्यादा 25 लाखां मेरेन आसा. येवजणे खातीर उण्यांत उणे 8 वी पास आसप गरजेचें. 15 वर्सां गोंयांत रावपी आसूंक जाय. 15 वर्सां गोंयांत रावना जाल्यार लेगीत गोंयकारा कडेन लग्न जाल्ले दादले, बायलो हे येवजणे खातीर पात्र थारता. अर्जदार हेर बँकांचे डिफॉल्टर आसूंक फावना. उद्देगा खातीर हेर सवलतींचो तशेंच हेर येवजण्यांचो लाव घेवपी मनीस हे येवजणे खातीर पात्र थारचो ना.
सोरो आनी तंबाखू संबंदीत उद्देग सोडल्यार हेर सगळ्या उद्देगां खातीर हे येवजणे वरवीं रीण मेळटलें. येवजणे खाला रीण मंजूर केल्या उपरांत लावार्थ्याक 30 दिसांचें प्रशिक्षण घेवचें पडटलें. अर्थीक उदरगत म्हामंडळा वरवीं हें प्रशिक्षण दितलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
