भांगरभूंय | प्रतिनिधी
म्हापशें: सिरसय हांगा दोळो लागून नियंत्रण गेल्ल्यान मोटारीन रस्त्याचे कुशीक आशिल्ल्या झाडाक धपको दिलो. ह्या आपचलीत अपघातांत मोटार चालक प्रकाश घाडी हो गंभीर जखमी जालो. जखमी घाडी हो उजो पालोवपी दळाचो कर्मचारी आसून तो पिळर्ण स्थानकांत काम करता.
हो अपघात बिरेस्तारा दनपारां 12.10 वरांच्या सुमाराक घडलो. जखमी घाडी हो आपल्या जीए 04 सी 6458 क्रमांकाचे ओमनी मोटारींतल्यान कासारपाल सावन म्हापशेंचे वटेन वतालो. वाटेर सिरसयत पंचायती कुशीक ताचो दोळो लागलो आनी मोटारीचो विरोधी दिशेन वचून रस्त्याचे कुशीक कांय अंतराचेर आशिल्ल्या झाडाक धपको बसलो.
ह्या अपघातांत मोटारीच्या दर्शनी भागाचें लुकसाण जावन तातूंत चालक प्रकाश घाडी हो जखमी जावन आडकलो. घडणुकेची म्हायती मेळटकूच कोलवाळ पुलीस आनी म्हापशें उजो पालोवपी दळाच्या जवानांनी घडणूक थळार धांव घेवन घाडीक सुखरूप भायर काडलो आनी ताका म्हापशेंच्या जिल्हो हॉस्पिटलांत दाखल केलो.
जखमीच्या पांयाक मोटी दुखापत जाल्या. हॉस्पिटलांत ताचेर उपचार सुरू आसात. अपघाताचो पंचनामो पुलीस हवालदार अनील शेट्येन केलो. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
