भांगरभूंय | प्रतिनिधी
भांगरभूंय । प्रतिनिधी
पणजी : गोंयांत कुपोशणाची समस्या निर्माण जाल्या. सध्या राज्यांत 25 कुपोशीत भुरगीं आसात. तांची भलायकी सुदारची म्हूण महिला आनी बाल कल्याण खातें नेटान यत्न करता. भुरग्यांच्या खावपा- पिवपाचे सवयींनी बदल जाल्ल्यान आनी जल्मा उपरांत आवयचें दुदाचें उणावाक लागून गोंयांत कुपोशणाची गंभीर समस्या निर्माण जाल्या.
भलायकी क्षेत्रांत चडांत चड निधी खर्च करपाक गोंय देशांत पयल्या क्रमांकाचेर आसा अशें नीती आयोगान आपल्या अहवालांत हालींच स्पश्ट केलां. पूण फाटल्या कांय वर्सां सावन गोंयांत भुरग्यां मदीं वाड जावन ना, वजन उणें जावप आनी रगत उणें जावप हे प्रकार वाडत आसात असोय उल्लेख आयोगान अहवालांत केला.
राज्य कुटुंब कल्याण ब्युरोचे मुखेल वैजकी अधिकारी डॉ. राजेंद्र बोरकार हांणी सांगलें की, भुरग्यांच्या आहारांत बदल, जंक फूडाचो वापर वाडत आशिल्ल्यान आनी जल्मा उपरांत दोन वर्सां आवयच्या दुदाचो उणाव हाका लागून राज्यांत ह्यो समस्या निर्माण जावपाक लागल्यात. ह्या कारणांक लागून गोंयांत 25 कुपोशित भुरगीं मेळ्ळ्यांत, आनी तांकां पोसपा खातीर सरकार पुराय यत्न करता अशें तांणी सांगलें.
आदल्या काळांत भुरग्यांक दिताले त्या पारंपरीक जेवणांतल्यान फावो तें लोखण आनी प्रथिन मेळटालें. पूण काळा प्रमाण गोंयांतले कांय लोक अस्तंती संस्कृताय आपणावंक लागल्यात. अशा कुटुंबांत जंक फूड आनी बिगर पोशण खाद्य पदार्थांक परंपरीक खाणां परस प्राधान्य दितात. सांज जाली काय लोक पासयेक वचून हें जंक फूड खातात. ते भायर भुरग्याच्या जल्मा उपरांत पयले स म्हयने ताका फकत आवयचें दूद मेळपाची गरज आसता. उपरांत फुडल्या दोन वर्सां खातीर आवयच्या दुदा वांगडा हेर पोशक तत्वां मेळप गरजेचें आसता. पूण गोंयांतल्यो कांय आवय वेगवेगळ्या कारणांक लागून भुरग्यांक दुदाक धरीनात. खरें म्हणल्यार तांकां लोखण, प्रथिन भरपूर आशिल्लें अन्न लेगीत दिनात. भुरग्यांची पिराय वाडले उपरांत ताचो परिणाम दिसता, ल्हानपणाचेर कितेंय खातात ताचो फटको बसपाक लागला अशेंय डॉ. बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
