सांबाळून : मांद्रें, पेडणेंचे रस्ते खणिल्ल्यान धोको, चरींनी भरलां उदक
भांगरभूंय | प्रतिनिधी
पेडणें : मांद्रें आनी पेडणें मतदारसंघांतल्या विवीध वाठारांनी रस्त्या पोंदच्यान लायटीचे केबल घालपाक चर मारिल्ले. तांकां सध्या गटारांचें स्वरूप घेतलां. कांय सुवातांचेर रस्तो गायब जाल्लोय पळोवपाक मेळटा. कांय चरी रस्त्यार मदींच मारिल्ल्यान धोको निर्माण जाला.
पावसा पयलीं हे सगळे रस्ते सारके करपाची मागणी नागरीक करताले. पूण बांदकाम खातें आनी रस्तो विभागान आडनदर केल्ल्यान हें काम वेळार करप तांकां जमूंक ना.
सध्या रस्त्यार पडिल्लीं फोंडकुलां फातर घालून पुरोवपाचे तात्पुरते यत्न बांदकाम खातें आनी रस्तो विभाग करतना नदरेक पडटा.
ह्या वाठारांतले लोक हागाच्यान यो- वच करतात. दोन चाकी वाहन चालकांक चड त्रास सोंसचे पडटात. हे चर वीज खात्यान खणल्यात. पूण बांदकाम खात्याक तीं पुरोवपाक अपेस आयलां.
मजगतीं, मांद्रें स्वराज्य संस्थेन भौशीक बांदकाम खातें, रस्तो विभाग, वीज विभाग, थळावे आमदार हांकां लेखी निवेदन दिवन हे रस्ते सारके करपाची मागणी केल्ली. पूण हाचे कडेन पुरायेन आडनदर जाल्ल्यान हे रस्ते धोक्याचे जाल्यात. फोंडकुलांनी उदक भरिल्ल्यान तळ्याचें स्वरूप निर्माण जालां. ताका लागून फोंडकूल नेमकें खंय आसा हाचो अदमास लागनाशिल्ल्यान अपघात जावपाची शक्यताय वाडल्या.
हे समस्येचेर जाता तितले बेगीन कितेंय उपाय काडचो, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
