भांगरभूंय | प्रतिनिधी
मुख्यमंत्रीः सगल्या फार्मासींनी जनौशदी वखदां जातलीं उपलब्ध
पणजी : अॅलोपॅथी वखदांचे तुळेन जनौदशी वखदांचें दर बरेच उणे आसता. येता त्या वर्सांत भलायकी केंद्रां तशेंच सरकारी हॉस्पिटलांनी जनौशदी केंद्रां स्थापन जातलीं अशें मुख्यमंत्री डॉ. प्रमोद सावंत हांणी स्पश्ट केलें.
मिनेझीस ब्रागांझा सभाघरांत जनौशदी दिसाची कार्यावळ जाली. हे कार्यावळींत मुखेल सोयरे म्हूण उलयतना मुख्यमंत्री डॉ. प्रमोद सावंत हांणी ही घोशणा केली. जनौशदी केंद्रां सुरू जातकूच जनौशदी वखदां उपलब्ध जातलीं. तशेंच सामान्य मनशाक जनौशदी उपचार पद्दतीची म्हायती मेळटली. जनौशदी वखदां भारता खातीर नवी न्हय. पुरातन काळा सावन जनौशदी वखदां देशांत आसात. हाचो प्रसार आनी प्रचार जावंक ना. जनौशदी वखदांचो प्रसार आनी प्रचार जावपाची गरज आसा. जनौशदी वखदां तशेंच उपचार पद्दत सगल्या लोकां मेरेन पावची हें प्रधानमंत्री नरेंद्र मोदी हांचे सपन आसा. हें सपन साकार करपा खातीर प्रधानमंत्री जनौशदी येवजण सुरू जाल्या. अॅलोपॅथी वखदांचे तुळेन जनौशदी वखदांचे मोल खूबशें उणें आसता. जनौशदी वखदांक लागून 66 हजार कोटी रुपयांचो खर्च उणो जाला. डोलो गुळयांची स्ट्रीप 30 रुपया आसता. जनौशदी डोलोची स्ट्रीप 3 रुपयांक मेळटा. जनौशदी वखदांच्या वापरांतल्यान भलायकी उपचारा वेलो खर्च उणो जातलो. तशेंच सिप्ला सारक्यो ब्रँडेड कंपनीं जनौशदी वखदांची निर्मिती करपाक लागल्या. हाका लागून जनौशदी वखदांचो वापर करपाक हरकत ना अशें मुख्यमंत्री डॉ. प्रमोद सावंत हांणी सांगलें.
ह्या वेळार जनौशदी वखदांचो कावंटर सुरू करपी वेवसायिकांचो भोवमान जालो. अन्न आनी वखदां प्रशासनाच्यो संचालक ज्योती सरदेसाय हांचेंय उलोवप जालें.
दरेका फार्मासींनी जनौशदी कावंटर
सगल्या फार्मसींनी जनौशदी वखदांची विक्री जावपाक जाय. हाचे खातीर कावंटर सुरू करपाचें परिपत्रक सरकार जारी करतलें अशें भलायकी मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
