भांगरभूंय | प्रतिनिधी
पेटीएमा कडेन अर्थीक फांट्याची कबलात
पणजी : कॅशलेस अर्थीक वेव्हारांच्या मळार गोंय हेर राज्यां परस एक पावस फुडें आसतलें, अशें मुख्यमंत्री डॉ. प्रमोद सावंत हांणी सांगलें. सरकारी खात्यांच्या कॅशलेस अर्थीक वेव्हारां खातीर अर्थीक फांट्यान शुक्रारा पेटीएमा कडेन समजिकाय कबलात (एमओयू) केली. हाचे उपरांत उलयतना मुख्यमंत्र्यांनी हो विस्वास उलोवन दाखयलो.
पेटीएमा कडेन जाल्ले कबलातीक लागून गोंय सरकाराच्या खात्यांचे सगले अर्थीक वेव्हार कॅशलेस जातले. देशाची अर्थवेवस्था कॅशलेस जावची, अशें प्रधानमंत्री नरेंद्र मोदी हांचे सपन आसा. तांचे हे सपन पुराय करपाचे दिशेन गोंयची वाटचाल सुरू आसा, अशें मुख्यमंत्री डॉ. प्रमोद सावंत हांणी सांगलें.
पेटीएमा कडेन समजिकाय कबलाती खेरीत सरकारान आयसीएआय आनी क्रेडीट गॅरेंटी ट्रस्ट फंड ह्या संस्थां कडेन समजिकाय कबलाती केल्यो. उद्देगांक रीण दिवपा खातीरची मुख्यमंत्री सरल उद्देग येवजण चालीक लागतली. आयसीएआय कडेन केल्ले कबलातीक लागून धोरण आंखप, जीएसटीचे सरकारी अधिकाऱ्यांक प्रशिक्षण आदी कार्यावळींक गती मेळटली. गोंय सरकारान आयज तीन संस्थां कडेन कबलाती केल्यो. ताका लागून लघू तशेंच मध्यम उद्देगांक रीण मेळप मुख्यमंंत्री सरल येवजणेक लागून सोंपे जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
