भांगरभूंय | प्रतिनिधी
बार्देसांतल्य सवाय धान्य दुकान धनयांची मागणी
म्हापशें: नागरी पुरवण खातें फक्त धान्याचो कोटो वितरीत करता. पूण हो कोटो उबारपा पसून कामगारां वयलो खर्च सवाय धान्य दुकान धनयांकूच उबारचो पडटा. हाका लागून अर्थीक खर्च सोंसचो पडटा. हें अर्थीक लुकसाण पयस करपा खातीर सरकारान आमकां म्हयन्याक अनुदानाच्या रुपांत उण्यांत उणें 25 ते 30 हजार रुपया दिवचे. तशेंच थकबाकी लेगीत दिवची अशी मागणी बार्देसांतल्या सवाय धान्य दुकान धनयांनी केल्या.
मंगळारा, नागरी पुरवण खात्याक मागणी निवेदन भेटयले उपरांत हे दुकानदार पत्रकारां कडेन उलयताले. ह्या वेळार रेजिनाल्ड लोबो, विठ्ठल दळवी, ज्ञानेश्वर कांबळी तशेंच हेर सवाय धान्य दुकान धनी हाजीर आशिल्ले.
गोंय सरकारान आमचो प्रस्न गंभीरतायेन घेवचो. आमची मागणी केंद्रा कडेन मांडून आमकां अनुदान मेळोवन दिवचें अशी विनंती रेजिनाल्ड लोबोन केली. तशेंच केरळ, गुजरात ह्या राज्यांनी थंयचीं सरकारां वेवसायिकांक अतिरिक्त अनुदान दितात. गोंयांत अशे तरेची रक्कम कित्याक दिनात असो प्रस्न तांणी उपस्थीत केलो.
कोरोना काळांत ज्या वेळार लोक घरांत आशिल्ले, तेन्ना लोकांच्या दारांनी वचून सेवा दिवन धान्य वितरीत केलें. पूण हे सेवेची सादी दखल लेगीत सरकारान घेतली ना अशें लोबोन म्हणलें.
रेशना वयलो कोटो हाडटना पयली रक्कम सरकारी तिजोरींत भरची पडटा. जानेवारी म्हयन्यांतलो कोटो हाडले उपरांत सरकारान हो कोटो फुकट वितरीत करपाचे निर्देश दिले. ताका लागून फेब्रुवारी सावन फुकट धान्य कोटो उबारप आमकां शक्य जावचें ना अशें लोबोन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
