भांगरभूंय | प्रतिनिधी
नवी दिल्ली, खबरां संस्था: कॅनरा बँकेचें रीण बुडयल्ल्या प्रकरणांत प्रकरणांत जेट एअरवेजचे संस्थापक नरेश गोयल हांकां १ सप्टेंबराक ईडीन अटक केल्ली. ते उपरांत बंदखणींत आशिल्ल्या नरेश गोयल हांकां काल खाशेल्या न्यायालयांत हाजीर केलो. ‘‘जिणेची सगळी आस्त सोंपली. सद्याचे अवस्थेंत रावपा परस बंदखणींत मरप बरें. नशीबान जें बरयलां ताका तोंड दिवपाक तयार आसां’’ अशें म्हणून ते विशेश न्यायालया मुखार रडले.
आपल्या दुयेंत बायलेची याद येता आनी तिची जतनाय घेवपी कोणूच ना अशें गोयल हांणी न्यायालयांत सांगलें. ७४ वर्सां पिरायेचे गोयल हांची बायल अनिता हिका कॅन्सर जाला आनी सध्या तिचेर उपचार सुरू आसात. फाटल्या वर्सा ईडीन अटक केले उपरांत नरेश गोयल आर्थर रोड बंदखणींत न्यायालयीन ताब्यांत आसा. खाशेल्या न्यायालयाचे न्यायाधीश एम. जी. देशपांडे हांचे मुखार गोयल हांणी जामीनाचो अर्ज दाखल केल्लो.
सुनावणी वेळार नरेश गोयलान हात जोडून न्यायालयाक सांगलें, ‘‘म्हजी भलायकी नाजूक आसा. बायल कॅन्सरा कडेन झुजता आनी एकली धूवूय दुयेंत आसा. बंदखणीचे अधिकारी म्हाका मजत करपाची भुमिका घेतात, पूण तांकांय कांय मर्यादा आसात.’’
गोयल हांचे बायलेचेर जे जे हॉस्पिटलांत उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
