भांगरभूंय | प्रतिनिधी
न्या. महेश सोनक: अॅड. मनोहर उसगांवकार हांकां आयएमबी सभाघरांत ओंपलीं आर्गां
पणजी: अॅड. मनोहर उसगांवकार हांच्या ज्ञानरुपी तेजान आमकां प्रबुद्ध केले. ते आमचे मुखार लखलखीत उदाहरण आशिल्ले. तांणी आपले ज्ञान हेरांक दिलें, वारसो दिलो, खूबशा जाणांचो फुडार घडयलो. ते नितीमान, सुसंस्कृत व्यक्तीमत्व आशिल्ले. सगल्यांक बरोबर घेवन तांणी वाटचाल केली. मुंडकार, कूळ कायद्याचे वटेन ते वावुरले. तांच्यो यादी सांबाळून दवरतले अशें सांगून उच्च न्यायालयाचे न्यायमुर्ती महेश सोनक हांणी आदले अॅडव्होकेट जनरल अॅड. मनोहर शेणवी उसगांवकार हांकां काल (बुधवारा) आर्गां ओंपलीं.
उसगांवकार हांकां आर्गां ओंपपा खातीर आयएमबी सभाघरांत जाल्ले शोकसभेंत न्यायमुर्ती सोनक उलयताले.
मुख्यमंत्री डॉ. प्रमोद सावंत हांचे अध्यक्षताये खाला जाल्ले सभेंत माचयेर अॅडव्होकेट जनरल अॅड. देविदास पांगम, आदले केंद्रीय कायदो मंत्री अॅड. रमाकांत खलप, ज्येश्ठ वकील अॅड. अवधूत सलत्री, इन्स्टिट्यूट मिनेझीस ब्रागांझाचे अध्यक्ष दशरथ परब हाजीर आशिल्ले.
अॅड. देविदास पांगम हांणी उसगांवकार हांकां आयिल्ल्या मरणाचें दुख्ख उक्तावचे परस तांणी जो वारसो फाटल्यान दवरला ताचो विचार करूंक जाय. तांणी पुर्तुगेज कायदे इंग्लीशींत हाडपाचें व्हड काम केलां, आनी खाशेलेपण म्हणल्यार सर्वोच्च न्यायालयान तांणी भाशांतरीत केल्ले कायदे विश्वासार्ह मानले. तांची कायद्याच्या विशयाचीं व्याख्यानां मार्गदर्शक थारलीं. तांच्या मार्गदर्शना खाला खूबशे ज्येश्ठ वकील जाले. ते न्यायमुर्तीपदाचेरूय पावले. गोंय लॉ टायम हे पयलें कायद्या विशयाचें जर्नल तांणी काडले तें सामके उपेगी थारलें. तांच्या मार्गान वचप हीच तांकां आर्गां थारतलीं.
अॅड. रमाकांत खलप हांणी म्हणलें, म्हजे गुरू अॅड. मनोहर उसगांवकार हांणी कायदो विश्वाक वेगळें मोडण दिलें. वकिलांनी कशें आसचें हाचो वस्तुपाठ घालून दिलो. आयज देश न्यायीक संघर्शांतल्यान वचत आसा. अशा वेळार तांच्या सारक्या दीपस्तंभांची, मार्गदर्शकाची उणीव जाणवता. कायदे करीत आसतना, ताची अंमलबजावणी करीत आसतना ताचो समाजाचेर कितलो परिणाम जातलो हाचो तांणी सदांच विचार केलो. ते सदांच विनयशील वृत्तीन वावुरले.
ह्या वेळार उच्च न्यायालयाचे बार असोसिएशनाचे अध्यक्ष जिल्मन कुएल पेरेरा, म्हापशें बार असोसिएशनचे अध्यक्ष परेश राव, रोटरी म्हापशेंचे अध्यक्ष सचीन मेंडसे हांचींय आर्गां ओंपपीं उलोवपां जालीं.
अॅड. अवधूत सलत्री हांणी प्रास्तावीक केलें. दशरथ परब हांणी डॉ. उसगांवकार आनी अॅड. उसगांवकार ह्या दोन उसगांवकारां विशीं लोकां मदीं कितलो आदर आशिल्लो हें सांगलें.
शोकसभेक मडगांवचे आमदार दिगंबर कामत, उद्देगपती श्रीनिवास धेंपे आनी दिलीप साळगांवकार, न्यायमुर्ती खांडेपारकार, न्यायमुर्ती कामत, अॅड उसगांवकार हांचे कुटूंब, वकील आनी विवीध मळा वयले मानेस्त हाजीर आशिल्ले.
अॅड. उसगांवकारांचें सांगणें म्हणल्यार निमाणें: मुख्यमंत्री
पुर्तुगेज कायदे इंग्लीशींत भाशांतरीत करपाक अॅड. मनोहर उसगांवकार हांणी दिल्लें योगदान अपूर्व आसा. तांणी पुर्तुगेज कायद्यांचें केल्ल्या भाशांतराचो लाव हेर राज्यांतल्या न्यायालयांकूय जालो. अॅड. उसगांवकार हांणी सांगप म्हणल्यार निमाणें अशी सर्वसामान्यांची धारणा आशिल्ली. इतली विश्वासार्हता तांणी मेळयिल्ली. समान नागरी कायदो तांकां अभिप्रेत आशिल्लो. तांची पुराय जीण सदांच यादींत उरतली. गोंयकारांचे वतीन हांव तांकां आर्गां ओंपतां अशा उतरांनी मुख्यमंत्री डॉ. प्रमोद सावंत हांणी अॅड. उसगांवकार हांकां आर्गां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
