भांगरभूंय | प्रतिनिधी
भांगरभूंय । प्रतीनिधी
फोंडें: धारबांदोडें म्हालांतलो संजीवनी साकर कारखानो सद्या बंद पडपाचे वाटेर आसा. ऊस उत्पादकांक दिल्लीं आस्वासनां पुराय करपाक सरकार अपेशी थारलां. हातूंत कामगारांक स्वेच्छा निवृत्ती दिवपाचो निर्णय घेवन सरकारान एके तरेन ऊस उत्पादकांक आनी कामगारांक घरची वाट दाखोवपाचो यत्न केल्ल्याचें दिसून येता.
संजीवनी साकर कारखानो बंद करचे पयलीं राज्य सरकारान केंद्र सरकाराचे येवजणे खाला कारखान्यांत आधुनीक तरेचीं यंत्रणां बसोवन ऊस उत्पादकांचो संभ्रम पयस करपाचें आस्वासन दिल्लें. पूण 3 वर्सां सरलीं तरी कारखानो सुरू करपाची कसलेच तरेची हालचाल आजून मेरेन दिसना. मदींच सरकारान इथेनॉल प्रकल्प सुरू करपाची घोशणा करून कामगार आनी ऊस उत्पादकांच्यो अपेक्षा वाडयल्ल्यो. पूण सरकाराच्या कामाचो वेळ पळयल्यार इथेनॉल प्रकल्प फुडल्या वर्साय सुरू जावपाची शक्यताय उणी दिसता. ताका लागून सरकारान दिल्लीं आस्वासनां पुराय करूंक नाशिल्ल्यान शेतकार तिडक उक्तायतात.
दिल्लीं आस्वासनां भाजपान पाळूंक नाशिल्ल्यान ताचो लाव घेवपाचो यत्न निश्चीतूच विरोधी पक्ष करतले.
ऊस उत्पादक संघटणेचे अध्यक्ष राजेंद्र देसाय हांणी, सरकारान कारखानो सुरू करून ऊस उत्पादकांक दिल्लीं आस्वासनां पुराय करपाची गरज आसा, अशें सांगलें. विधानसभा अधिवेशनांत कारखान्याच्या बर्या खातीर खर निर्णय घेवप काळाची गरज आसा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
