भांगरभूंय | प्रतिनिधी
ख्रिस्तोफर फोन्सेका हांची सरकारा कडेन मागणी
फोंडें ः धारबांदोडें संजीवनी सहकारी साकर कारखान्याच्या 177 कर्मचाऱ्यांक स्वेच्छा निवृत्ती दिवपाचो निर्णय सरकारान घेतला. ही प्रक्रिया सुरू जाल्या. हो निर्णय योग्य ना. ह्या कर्मचाऱ्यांक सरकारान स्वेच्छा निवृत्ती दिवची न्हय. ताचे बदला हेर खात्यांनी तांचो आस्पाव करचो. जाका लागून ते बेरोजगार जावचे नात आनी तांच्या घरच्यांचेर परिणाम जावचो ना, अशें आयटक संघटनेचे फुडारी ख्रिस्तोफर फोन्सेका हांणी सरकारा कडेन मागलां.
सरकारान घेतिल्ल्या निर्णया प्रमाण, 177 कर्मचाऱ्यां मदल्या सुमार 65 ते 70 टक्के कर्मचाऱ्यांक निवृत्ती उपरांत इथेनॉल प्रकल्पांत आस्पावन घेतले. उरिल्ल्या 30 -35 टक्के कर्मचाऱ्यांक घरा बसचें पडटलें. हाका लागून सगल्याच कर्मचाऱ्यांचेर खूब ताण आयला. ह्या कर्मचाऱ्यांक आदार दिवपा खातीर आयटीसीचे फुडारी फोन्सेका आनी बालाजी मयेकार हांणी सोमारा बसका घेतली. हे बसकेंत कारखान्यांतले सगळे कर्मचारी हाजीर आशिल्लें. ताणें ह्या जाग्यार वयर उल्लेख केल्ली मागणी केल्या.
संजीवनी साकर कारखान्यांत 99 कायम आनी 78 कंत्राटी कर्मचारी आसात. हो कारखानो 2019 वर्सा बंद जाल्लो. पूण कर्मचारी कारखान्यांत येवन वेगवेगळे प्रकारचीं कामां करतात. शेतकी संचालक नेव्हिल अल्फान्सो हांणी कारखानो प्रशासक सतेज कामत हांकां 1 जून दिसा सगळ्या कर्मचाऱ्यांक निवृत्ती दिवपाचो अहवाल सादर करपाचो आदेश दिल्लो. ते प्रमाण प्रशासकान अहवाल सादर केला.
ज्या कर्मचाऱ्यांक स्वेच्छा निवृत्ती दितात, तातूंतले चडशे कर्मचारी इथेनॉल प्रकल्पांत घेतले. पूण भलायकी, दुयेंस आनी हेर कारणांक लागून सुमार 30- 35 टक्के कर्मचाऱ्यांक इथेनॉल प्रकल्पांत घेवचे नात. ह्या प्रकल्पांत उरिल्ल्या सगल्या कामगारांक काम दितले अशें सतेज कामत हांणी पयलींच स्पश्ट केलां. हाका लागून कामगारांचेर मानसीक ताण वाडला. कुटुंबाचो उदरनिर्वाह कशो करचो हो प्रस्न तांकां पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
