संजिवनींत सप्टेंबर उपरांत शुकशुकाट

भांगरभूंय | प्रतिनिधी

कामगारांची स्वेच्छा निवृत्ती अटळ

पणजी: गोंयचे पयले मुख्यमंत्री भाऊसायब बांदोडकार हांच्या सपनांतलो संजिवनी साकर कारखानो रोखडोच इतिहास जमा जातलो. कारखान्यांतल्या कामगारांची स्वेच्छा निवृत्ती अटळ जाल्या. सप्टेंबर म्हयन्या उपरांत कारखान्यांत शुकशुकाट पातळटलो. स्वेच्छा निवृत्ती दिवपाची प्रक्रिया पुराय जावपाच्या मार्गार आसून ताका लागून कामगार वर्गा मदीं निरशेणी पातळ्ळ्या.
संजिवनी साकर कारखान्याच्या 95 कायमस्वरुपी कामगारांक स्वेच्छा निवृत्ती दिवपाचे प्रक्रियेक गती आयल्या. येता त्या सप्टेंबर म्हयन्या मेरेन प्रक्रिया पुराय जातली. प्रक्रिया पुराय करपाचो आदेश कृशी खात्यान संजिवनी साकर कारखान्याचे प्रशासक सतेज कामत हांकां दिल्यात. स्वेच्छा निवृत्ती संबंदी प्रशासक सतेज कामत 10 जुलय दिसा खास बसका घेवपाचे आसून, ते बसकेचो अहवाल रोखडोच सरकाराक धाडून दितले. स्वेच्छा निवृत्ती उपरांत कामगारांक कुटुंबांचो उदरनिर्वाह करपाचो प्रस्न उपस्थीत जाला.
संजिवनी साकर कारखान्याच्या कामगारां विशींची सरकाराची दोट्टी भुमिका कामगारां खातीर तकलीफोड थारल्या. कारखानो बंद जाले उपरांत सरकारान सगल्या कामगारांक कृशी, बांदकाम, उदका स्रोत आनी गोरवां सांबाळ खात्यांत आस्पावन घेवपाची घोशणा केल्ली. सरकारान केल्ले घोशणेचेर विसर पडला. तातूंत कामगारांनी लेगीत सरकाराक घोशणेची अजून मेरेन याद करून दिल्ली ना. ते खातीर स्वेच्छा निवृत्ती उपरांत कामगारांक कुटुंबाचो उदरनिर्वाह करपाचो प्रस्न भेडसायत आसा.
स्वेच्छा निवृत्ती संबंदी अदीक म्हायती दितना प्रशासक सतेज कामत हांणी प्रक्रिया पुराय करपा खातीर सरकारा कडेन 3 म्हयन्याची मुजत मागल्या. कृशी खात्यान कामगारांक पगार दिवपाक न्हयकार दिला आनी सप्टेंबर मेरेन सगल्यांक स्वेच्छा निवृत्ती दिवपाचो विचार केला. 10 जुलय दिसा कामगारांच्या शिश्टमंडळा बरोबर बसका जावपाची आसून बसकेचो अहवाल सरकाराक सादर करतले अशें तांणी सांगलें.
मजगतीं, संजिवनी साकर कारखान्याच्या 79 कंत्राटी कामगारांच्या कंत्राटाचें अजून नुतनीकरण केल्लें ना. 3 जून दिसा कंत्राटदाराची मुजत सोंपिल्ली. उपरांत फाटलो एक म्हयनो कंत्राटी कामगार गटी कडेन येवन कंत्राट नुतनीकरणाची वाट पळयतात. गोपां कडल्यान मेळिल्ले म्हायती प्रमाण कंत्राटी कामगारांच्या कंत्राटाचें हाचे मुखार नुतनीकरण करचे नात अशें समजता.