भांगरभूंय | प्रतिनिधी
काणकोण: शेळी-लोलयां आपचलीत जाल्ल्या अपघातांत स्कुटरीच्या (जीए 10 डी 4352) फाटल्यान बशिल्ल्या तरणाट्याक मरण आयिल्ल्यान काणकोण पुलिसांनी स्कुटर चालक अँथनी फिलीप फर्नांडीस (22) ह्या दुचाकी चालकाचेर गुन्यांव नोंद केला.
अँथनी फर्नांडीस हो पोळें-लोलयें हांगासरलो आसून, अपघातांत मरण आयिल्लो वेलेंटायन आलेक्स बार्रेटो (32) हो तरणाटो नगर्श्यां ओंकार इमारतींत रावतालो. दोगूय दापट सावन पोळ्यां वताले.
शेळी हांगा पावतकूच चालकाचो दुचाकी वयलो ताबो गेलो आनी स्कुटर रस्त्याचे भायर गेली आनी मुखा वयल्या फातराक आपटली. ह्या अपघातांत दोगूय जखमी जाले. जखमी अवस्थेंत दोगांकूय काणकोणच्या हॉस्पिटलांत दाखल केले.
वेलेंटायनाचेर मुळावे उपचार केले उपरांत ताका फुडल्या उपचारा खातीर बांबोळे गोंय वैजकी म्हाविद्यालयाच्या हॉस्पिटलांत धाडून दिलो. पूण ताणें निमाणो स्वास सोडलो.
काणकोण पुलिसांनी दुचाकी चालक अँथनी फर्नांडीस हाचे आड गुन्यांव नोंद केला. फुडलो तपास पुलीस उपनिरिक्षक रामचंद्र नायक करतात.
मजगतीं, वेलेंटायन बार्रेटो हाचेर आयज (बिरेस्तारा) सांजवेळा 4 वरांचेर सेंट तेरेझा चर्चीचे मसंडभुंयेंत निमाणे संस्कार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
