भांगरभूंय | प्रतिनिधी
जमनी पोंदच्यान सरयो घालपाच्या कामाक लागून लोकांक सोंसचे पडटात त्रास
फोंडें: शिरोड्यां पंचायत वाठारांत जमनी पोंदच्यान सरयो घालपाचें काम सध्या चालू आसा. हें काम सध्या लोकांक त्रासाचें जालां.
पावसांत हें काम सुरू केल्ल्यान पुराय वाठारांत चिखल जाला. ह्या चिखलांतल्यान लोकांक तशें विद्यार्थ्यांक यो-वच करचें पडटा. खुबशे दोन चाकी चालक ह्या चिखलांत निसरून पडल्यात. ताका लागून हांगा कितेंय उपाय करपाची मागणी थळावे लोक करतात.
शिरोडा बाजारांतल्यान आस्कणवाडो, सकले आस्कण, शिरवाडो, तारिवाडो, देवतेभाट, तळपणें, बाग, सक्रे ह्या वाठारांनी वचपी रस्त्यांचेर चिखल जाला. लायटीचे केबल घालपा खातीर हो रस्तो दोनूय वटेन खणिल्ल्यान हे त्रास लोकांक सोंसचे पडटा. तशेंच रस्तो खणिल्ल्यान हांगच्या रस्त्यांचेर व्हडलीं फोंडकुलां पडिल्ल्यान पुराय रस्त्यार चिखल साठून उरला.
कांय दिसां पयलीं ह्या वाठारांत शेकरो घालून हीं फोंडकुलां पुरयल्लीं. पूण शेगीत पावस पडिल्ल्यान फोंडकुलांचो रस्तो हांगा तयार जाला.
जमनी पोंदच्यान केबल घालपाचें काम पावसा पयलीं करपाची गरज आशिल्ली. सरकारान जनतेक जावपी त्रासांचो अभ्यास करिनासतना ह्या कामाची सुरवात केल्या. ह्या रस्त्याचें पावसांत डांबरीकरण करप कठीण आशिल्ल्यान रस्त्याचे दोनूय वटेन सध्या पुरतें काँक्रीट घालपाची मागणी हांगचे नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
