भांगरभूंय | प्रतिनिधी
23 ते 26 डिसेंबर मेरेन विवीध धर्मीक आनी संस्कृतीक कार्यावळींचें आयोजन
मडगांव: फातर्पेंच्या श्री शांतादुर्गा फातर्पेंकान्न संस्थानाची वर्सुकी जात्रा आयच्यान 23 डिसेंबर ते 26 डिसेंबर मेरेन विवीध धर्मीक आनी संस्कृतीक कार्यावळींनी मनयतले. तशेंच देवीची चांदीचो रथ, मयूर रथ, सुर्य रथ तशेंच महारथांतल्यान मिरवणूक हे चार दीस काडटले.
फातर्प्यां संस्थानाच्या सभाघरांत मंगळारा आयोजीत पत्रकार परिशदेंत श्री शांतादुर्गा भुमीपुरुष, सप्तकोटेश्वर मंदीर समिती अध्यक्ष दिवाकर बो. ना. देसाय हांणी जात्रेची म्हायती दिली. ह्या वेळार तांच्या वांगडा संस्थानाचे सचीव संतोष आ. ना. देसाय, आनंद पा. ना. देसाय आनी मुखत्यार मंगेश भी. ना. देसाय हाजीर आशिल्ले.
आयज सकाळीं धर्मीक विधी, रातचें नमन, 10 वरांचेर शिबिकोत्सव, उपरांत श्रींची चांदीच्या रथांतल्यान मिरवणूक, आरती, प्रसाद आनी धनराज मडकयकार प्रस्तूत संगीत कार्यावळ- ‘स्वरधनू’ जातली.
फाल्यां सकाळीं धर्मीक विधी, महाभिशेक, रातच्या 10 वरांचेर शिबिकोत्सव, उपरांत श्रीची मयूर रथांतल्यान मिरवणूक, आतशबाजी, आरती, प्रसाद आनी कोंकणी नाटक ‘बायलेक दुवाळे, घोवाक ओंकारे’ सादर जातलें.
तिसर्या दिसा 25 डिसेंबराक सकाळीं धर्मीक विधी, महाभिशेक, रातच्या 10 वरांचेर शिबिकोत्सव, उपरांत श्रीची सूर्य रथांतल्यान मिरवणूक, आतशबाजी, आरती, प्रसाद आनी कोंकणी नाटक ‘रोम रोम रोमांटीक’ सादर करतले.
चोवथो दीस 26 डिसेंबराक सकाळीं धर्मीक विधी, श्रीचो महाभिशेक, रातच्या 10 वरांचेर ऑर्केस्ट्रा आनी फांतोडेर 6 वरांचेर श्रींची महारथांतल्यान मिरवणूक, आरती, प्रसाद आनी जात्रा सोंपतली.
दरदिसा दनपरां आनी रातचो देवीक महानैवेद्य आनी भाविकां खातीर महाप्रसादाचें आयोजन केलां.
28 ते 30 डिसेंंबर मेरेन भाविकांनी देवीक अर्पण केल्ल्यो भांगरां आनी चांदीच्यो वस्ती, कपडे आनी हेर वस्तुंची सकाळीं 10 ते सांजेच्या 5 वरां मेरेन पावणी जातली, अशें अध्यक्ष दिवाकर देसाय हांणी सांगलें.
जत्रेच्या काळांत भाविकां खातीर दोनूय वेळ जेवणाची वेवस्था केल्या. देवळाच्या वाठारांत सगळ्यांक लायव्ह सी. सी. टिवी सयत 35 कॅमेरे बसयल्यात. भाविकांचे वेवस्थे खातीर पुलिसां सयत स्वयंसेवकूय कार्यरत आसतले अशें अध्यक्ष देसाय हांणी सांगलें.
ह्या वेळार अध्यक्ष देसाय हांणी, श्री सप्तकोटेश्वर मंदिराचें 90-95 टक्के काम पुराय जालां उरिल्लें काम पुराय करपाक जाय. भविकांनी मजत केल्यार उरिल्लें काम रोखडेंच पुराय जातलें, अशी आस्त देसाय हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
