भांगरभूंय | प्रतिनिधी
संदीप निगळ्ये: स्वामी विवेकानंद विद्या प्रसारक मंडळाचें स्नेहसंमेलन उमेदीन
मडगांव: विवेकानंद विद्यालय आनी हेर फाट्यांनी दोळे दिपकावपी शिक्षणीक उदरगत बर्याच नेटान केल्या. विद्यार्थ्यांची पुरायेन उदरगत जावपा खातीर जे तरेन शिक्षक योगदान दितात तें खरेंच तोखणाय करपा सारकें अशें नामनेचे उद्देजक तशेंच राज डेव्हलपर्सचें संचालक मंडळ अध्यक्ष आनी समाजवावुरपी संदीप निगळ्ये हांणी सांगलें.
बोरयेंच्या विवेकानंद विद्यालयाच्या 37 व्या वर्सुकी स्नेहसंमेलनांत मुखेल सोयरे म्हणून ते उलयताले. धावेच्या बोर्डाचे परीक्षेंत येसाची परंपरा राखतना खेळां मळार राष्ट्रीय आनी आंतरराष्ट्रीय पावंड्यार आपलें नांव करपी ही संस्था तोखणायेक पात्र आसा, अशें निगळ्ये हांणी फुडें सांगलें.
कार्यावळीक परंपरीक तरेन येवकार गीतान सुरवात जाली. विद्यार्थी कलाकारांनी टाळ मृदंगाच्या गजरांत सादर केल्ले भजन दिंडींत सगळ्यांचें लक्ष ओडून घेतलें. मुखेल सोयर्यां हस्तुकीं परंपरीक दिवली पेटोवन स्नेहसंमेलनाचें उक्तावण जालें. संस्थेचे अध्यक्ष प्रकाश प्रभू हांणी सगळ्यांक येवकार दिलो. वेवस्थापक मीननाथ उपाध्ये हांणी सोयर्यांची वळख करून दिली.
मुख्याध्यापिका कल्पना बेहेरे हांणी शाळेचो अहवाल सादर केलो. माचयेर बोरयेचे सरपंच दुमींग व्हाज आनी कलमामळ वार्डाचे पंच सतीश बोरकार हाजीर आशिल्ले. मुखेल सोयर्यां हस्तुकीं विद्यार्थ्यांचो फुलां तुरो भेटोवन भोवमान केलो. हातूंत अखील भारतीय पावंड्यार पुराय भगवद्गीतेचे 18 अध्याय सादर करपी आनी शृंगेरी मठाधीपती जगद्गुरु शंकराचार्य हांचे हस्तुकी भोवमान जाल्ली मैथिली आमशेकार हिचो आस्पाव आशिल्लो. ह्या वर्साचीची आदर्श विद्यार्थिनी म्हणून नेमणूक जाल्ली विद्यार्थीनी दिव्या तेंडुलकार हिचोय यादस्तीक आनी फुलां तुरो भेटोवन भोवमान केलो. पालक शिक्षक संघाची अध्यक्ष निशा बोरकार हांणी उपकार मानले. शिक्षक चित्तरंजन देउलकार हांणी सुत्रसंचालन केलें. पालक, शिक्षक आनी ग्रामस्थांचे हाजेरींत ‘आजादी का अमृत महोत्सव’ ह्या विशयाचेर आदारून सांस्कृतीक कार्यावळ सादर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
