भांगरभूंय | प्रतिनिधी
कारणांचो सोद घेवपाची आमदार मायकल लोबोची मागणी
पणजी, प्रतिनिधी : अंदुच्या हंगामात विदेशी पर्यटकांचें प्रमाण 65 ते 75 टक्क्यांनी उणें जालां. नवें वर्स मनोपाक पर्यटक राज्यांत आयल्यात. पुण ऑक्टोबर सावन विदेशी पर्यटकांचें प्रमाण उणें आसा. पर्यटकांचें प्रमाण उणें जावपाच्या कारणांचो सोद घेवपाची गरज आसा, अशें आमदार मायकल लोबो हांणी म्हणलां.
देशी पर्यटकांचें प्रमाण पसून उणें जालां. भाजप पदाधिकाऱ्यांच्या बसके उपरांत उलयतान तांणी ही म्हायती दिली. पर्यटन हो राज्याचो मुखेल वेवसाय. टॅक्सी, हॉटेलां तशेंच दुकान वेवसायिकां खातीर राज्यांत पर्यटक येवप गरजेचें आसा. थायलंड, श्रीलंका तशेच आनीक कांय देश फ्री व्हिसाची सवलत दिवपाक लागल्या. हाका लागून पर्यटक गोंयां परस हेर थळांक पसंती दितात. राज्यांत मनस्ताप दिवपी येरादारी कोयंडी तशेच हेर प्रस्न आसात. विदेशी पर्यटकांचें प्रमाण उणे जावपाचीं तरेकवार कारणां आसात. तांचो सोद घेवपाक जाय. मुख्यमंत्री डॉ. प्रमोद सावंत हांचे कडेन कारणांचो सोद घेवपाची मागणी हांव करतलों, अशें मायकल लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
