भांगरभूंय | प्रतिनिधी
लोकांच्यो आरत्यो परत्यो प्रतिक्रिया
वास्को: वास्को शार वाठारांत हालींच हॉटमिक्स केल्ल्या रस्त्या मदल्या एका रस्त्यार गटाराची दुरुस्ती करपा खातीर रस्तो खणला. हो खणिल्लो रस्तो पळोवन लोकांनी अजाप उक्तायलां. ह्या प्रकरणांत समाजीक कार्यकर्ते शंकर पोळजी हांणी अशे तरेन लोकांच्या पयशांची उधळपट्टी करप कितले मेरेन योग्य आशिल्ल्याचो प्रस्न उप्रासायला. दोन विभागां मदीं समजिकाय नाशिल्ल्यान अशे प्रकार घडटात असो दावो तांणी केला.
शार वाठारांतल्या भितरल्या रस्त्यांचें हालींच हॉटमिक्स केल्ल्यान सगले रस्ते चकाचक जाल्ल्यान लोकांनी वास्कोचे आमदार कृष्णा साळकार हांची तोखणाय केल्ली. पूण पयलींच्या मार्केटा कुशीचो रस्तो दोन दिसां पयलीं खणलो. थंय रस्त्या सकयल्यान वचपी गटाराची दुरुस्ती हातांत घेतल्या.
थंय आतां सिमेंट काँक्रीट घालून गटाराचें बांदकाम सुरू आसा. हें काम हॉटमिक्स केले उपरांत हातांत घेतिल्ले खातीर लोकांच्यो प्रतिक्रिया व्यक्त जायत आसात. थंयचो रस्तो गटार दुरुस्ती उपरांत हॉटमिक्स करूंक जाय आशिल्लो वा हॉटमिक्स करचे पयलीं गटाराचें काम हातांत घेवंक जाय आशिल्लें अश्यो आरत्यो परत्यो लोकांच्यो प्रतिक्रिया आयकूंक मेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
