भांगरभूंय | प्रतिनिधी
पूण दुचाकी, चार चाकी वाहनांची गर्दी
वास्को: भाजी मार्केटांतले रस्ते मेकळे जाल्ल्यान कांय दुचाकी, चारचाकी वाहनचालक बिनधास्तपणान आपली वाहनां मार्केटांत हाडत आशिल्ल्यान गिरायकांनी आनी विक्रेत्यांनी अजाप उक्तायलां. आतां ह्या वाहनचालकांक शिस्त लावपा खातीर येरादारी पुलिसांनी कारवाय करपाची गरज लोकांनी उक्तायली.
भाजी मार्केटांतले फळां, भाजी, आडसरां, किराणा म्हाल आनी हेर म्हाल विक्रेते आपल्या दुकानां मुखा वेल्या रस्त्यार अतिक्रमण करून म्हालाची विक्री करताले. हाका लागून गिरायकांक चलप लेगीप कठीण जावंक लागिल्ल्यान कांय जाणांनी मुरगांव पालिका तशेंच वास्को पुलिसां कडेन कागाळी केल्ल्यो.
ह्या प्रकरणांत मुरगांव पालिकेन विक्रेत्यांक नोटिशी दिल्ल्यो. पूण विक्रेत्यांनी नोटिशी कडेन आडनदर केल्ल्यान मुरगांव पालिकेन वास्को पुलिसांच्या आदारान खर मोहीम राबयतना कांय विक्रेत्यांचो म्हाल जप्त केलो. रस्त्या वयलीं अतिक्रमणां कुशीक काडिल्लीं. ताका लागून आतां रस्तो मेकळो जाला. सद्या तरी कांय प्रमाणांत विक्रेत्यां मदीं शिस्त आयिल्ल्याचें दिसून येता.
रस्तो मेकळो जाल्ल्यान आतां मेकळेपणान मार्केटांत यो-वच करूंक मेळटलें अशें गिरायकांक दिसतालें. पूण आतां तांचे मुखार कांय दुचाकी, चार चाकी वाहन चालकांनी मोटे संकश्ट उबें केलां.
संबंदीत वाहन चालक आपलीं वाहन मार्केटांतल्यान व्हरत आशिल्ल्यान चलून वचप्यांक ती आडमेळीं थारूंक लागल्यांत. संबंदीत वाहन चालक आपली वाहनां मार्केटांतल्यान व्हरत आशिल्ल्यान चलून वचपी लोकांक ती आडमेळीचीं थारूंक लागल्यांत. संबंदीत वाहन चालवक आपली वाहनां रस्त्यारूच उबीं करीत आशिल्ल्यान रस्तो आडावन उरता. ह्या वाहनांक लागून चलून वचपी लोकांक अपघात जावपाची शक्यताय आसा. हे खातीर वास्को येरादारी पुलिसांनी लक्ष घालून मार्केटांत वाहनां हाडप्यां आड दंडात्मक कारवाय करची अशी मागणी जायत आसा. विक्रेत्यांनीय हे गजाली विशीं अजाप उक्तायलां. आमकां रस्त्या वयल्यान कुशीक काडले. आतां मार्केटांत वाहनां हाडटात तांकां शिस्त कोण लायतलो असो प्रस्न तांणी उप्रासायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
