भांगरभूंय | प्रतिनिधी
कोयर उडयल्यार खर कारवाय: रान खात्याची शिटकावणी
वाळपय: वाळपय होंडा मजगतच्या नागवें ते कुंभारखण ह्या वाठारांनी व्हड प्रमाणांत अनवळख्यां कडल्यान कोयर उडोवपाचे प्रकार घडत आसतात. हाका लागून सैमाचें लुकसाण जाता. संबंदीत पंचायतीन हे विशींचो आदेश काडून लेगीत हाचेर नियंत्रण येवंक ना. वाळपय ते होंडा मार्गान प्रवास करतना प्रवाश्यांक कोयराचे घाणीक सामकार वच्चें पडटा. हाची गंभीर दखल घेवन वाळपय रान खात्या वतीन काल (बिरेस्तारा) नितळसाण मोहीम हातांत घेतली. रान अधिकारी श्यामसुंदर गांवस हांच्या मार्गदर्शना खाला कर्मचारी आनी अधिकाऱ्यांनी नितळसाण मोहिमेंत व्हड प्रमाणांत वांटो घेतलो.
कुंभारखण ते नागवें मजगतच्या वाळपय शारांत येवपी मुखेल रस्त्याचे कुशीक खूबशे फावटी कोयर उडोवपाक प्रतिबंध आशिल्ल्याचो तक्टो लायला. पूण ताची दखल अजून मेरेन घेतिल्ली ना. खूबशे फावटी अनवळख्या वाहनांतल्यान रस्त्याचे कुशीक कोयर उडोवपाचे प्रमाण वाडूंक लागलां.
फाटल्या कांय दिसा सावन हातूंत व्हड प्रमाणांत वाड जाल्या. हाका लागून रस्त्याच्या दोनूय वटांनी कोयर उडयिल्लो दिसून येता. हाका लागून सैमाचें व्हड प्रमाणांत लुकसाण जाता. हे विशींची दखल घेवन वाळपयचे रान अधिकारी श्यामसुंदर गांवस हांच्या मार्गदर्शना खाला काल सकाळ सावन नितळसाण मोहीम हातांत घेतली. ह्या वेळार व्हड प्रमाणांत कोयर एकठांय करून ताचो विलो लायलो.
हे विशींची म्हायती दितना श्यामसुंदर गांवस हांणी सांगलें, खूबशे फावटी रस्त्याचे कुशीक कोयर उडोवचो न्हय अशी विनंती करून लेगीत ताचे कडेन आडनदर करतात ही दुर्दैवाची गजाल. कुंभारखण ते वाळप मजगतचें दोनूय वटांनी आशिल्लें रान हे पर्यावरणा खातीर पोशक स्वरुपाचें वातावरण निर्माण करपा खातीर म्हत्वाचो घटक थारता. तेच प्रमाणांत ह्या वाठारांत थंड वारो आशिल्ल्यान बऱ्या वातावरणाचो अणभव ह्या मार्गा वयल्यान प्रवास करप्यांक मेळटा. अशें आसून लेगीत ह्या मार्गार कोयर उडयत आशिल्ल्यान सैमाचें लुकसाण जाता अशें तांणी म्हणलें. ते खातीर काल सकाळ सावन ही मोहीम हातांत घेतली. रस्त्याचे दोनूय वटांनी आशिल्लो कोयर नितळ केलो. हाचे मुखार कोयर उडोवचो न्हय अशी विनंती श्यामसुंदर गांवस हांणी केली.
मजगतीं, रस्त्याचो कांय वाठार म्हाऊस पंचायत आनी पिसुर्लें पंचायत क्षेत्रांत येता. दोनूय पंचायतींनी हे विशींची विनंती केल्या. पूण ताचे कडेन कोणूच लक्ष दिनात हे विशीं गांवस हांणी हुस्को उक्तायलो.
काल सकाळ सावन हातांत घेतिल्ले नितळसाण मोहिमेंत रान अधिकारी नारायण नायक आनी हेरांनी म्हत्वाचें योगदान दिलें. तेच प्रमाण वाळपय रान कचेरेचे कर्मचारी हातूंत वांटेकार जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
