भांगरभूंय | प्रतिनिधी
फोंडे, प्रतिनिधी ः मुस्लिमवाडो भोमा काल रातीं स्कुटरीचो लायटीच्या खांब्याक धपको लागून प्रतिम रोमन बोरा (31, मुस्लिमवाडो, मुळ आसाम) हाका मरण आयलें. कालूच ताचो वाडदीस आसलो.
पुलिसांनी दिल्ले म्हायती प्रमाण, प्रतिम बोरा हो रातच्या 10.25 वरांचेर जीए- 05 के- 2783 क्रमांकाची स्कुटर घेवन बियरी हाडपाक वतालो. पूण कांय अंतराचेर गेले उपरांत स्कुटरीन महानंदू हायस्कुलाच्या मुखार आशिल्ल्या खांब्याक धपको दिलो. हांतूत तो गंभीर जखमी जालो. हॉस्पिटलांत व्हरतना वाटेक ताका मरण आयलें. आयज (सोमारा) म्हाड्डोळ पुलिसांनी पंचनामो केलो.
आयतारा प्रतिमाचो वाडदीस आशिल्लो. वाडदीस मनोवपा खातीर ताणें कुटुंब आनी इश्टां सयत चिकन आनी हेर तयारी पुराय केल्ली. पूण आपल्या इश्टां खातीर बियर हाडपाक स्कुटर घेवन वचपी प्रतिमाक अपघात जालो आनी ताका मरण आयलें. प्रतिम खोर्लीतल्या उद्देगीक वसणुकेंत काम करतालो. धुळापी हांगा बिराडाक रावपी प्रतिम देड म्हयन्या पयलीं बायलेक आनी दोन धुवांक घेवन मुसलमानवाडो भोमा हांगा बिराडाक रावपाक आयिल्लो. वाडदिसाच्या दिसा अपघातांत मरण आयिल्ल्यान वाठारांतल्या लोकांनी दुख्ख उक्तायता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
