वर्ल्ड कप वेळा पत्रकांत जालो बदल
भांगरभूंय | प्रतिनिधी
भारत आनी श्रीलंका खेळटले 2 नोव्हेंबराक
वर्ल्ड कप: विश्वचषक पात्रताय सर्तींत आयतारा श्रीलंकेन झिंबाब्वेक 9 विकेटींनी हारयले. ताका लागून दासुन शनाकाचो पंगड 2023 वर्साच्या विश्वचषका खातीर पात्र थारला. आतां 2023 वर्साच्या विश्वचषकांत भारत आनी श्रीलंका 2 नोव्हेंबराक खेळटले. मुंबयच्या वानखेडें स्टेडियमांत भारत आनी श्रीलंका हांचो सामनो जातलो. ताचे आदीं 2011 वर्साच्या विश्वचषकांत वानखेडे स्टेडियमाचेर भारत आनी श्रीलंकेच्या पंगडां मदीं सामनो जाल्लो. महेंद्र सिंग धोनी हांच्या फुडारपणाखाला टीम इंडियान श्रीलंकाक 6 विकेटींनी हारोवन 28 वर्सां उपरांत विश्वचषक ट्रॉफी मेळयल्ली.
ऑस्ट्रेलिये आड खेळून टीम इंडिया आपले मोहिमेची सुरवात करतली
भारतीय पंगड 8 ऑक्टोबराक ऑस्ट्रेलिये आड आपली मोहीम सुरू करतलो. भारत आनी ऑस्ट्रेलिये मदली मॅच चेन्नयच्या चेपॉक स्टेडियमाचेर जातली. रोहीत शर्मा हांच्या फुडारपणा खाला टीम इंडिया सर्तीचे दुसरे मॅचींत अफगाणिस्ताना आड खेळटली. भारत आनी अफगाणिस्तान हांचे मदली मॅच 11 ऑक्टोबराक जातली. दिल्लीच्या अरुण जेटली स्टेडियमांत दोनूय पंगड एकामेकांक तोंड दितले. रोहित शर्मा आनी कंपनी 15 ऑक्टोबराक पाकिस्ताना कडेन सामनो करतले. अहमदाबादच्या नरेंद्र मोदी स्टेडियमांत भारत पाकिस्तानाची मॅच जातली. हे सर्तीचे चवथे मॅचींत रोहित शर्माचो पंगड बांगलादेशा वांगडा खेळटलो. हे मोहिमेंत सगळ्यांत व्हडली आनी मनोरंजक मॅच जावपाची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
