भांगरभूंय | प्रतिनिधी
स्वच्छ भारत अभियान फक्त नांवां पुरतेंच
वास्को: वरुणापुरी जंक्शन ते शांतीनगर जंक्शन मजगतीं म्हामार्गा कुशीक कोयर उडोवपाचें प्रमाण दिसानदीस वाडत आसा. थंय उडयिल्लें बांदकामाचें टाकवू साहित्य, वेगवेगळे तरेचो कोयर राष्ट्रीय म्हामार्ग प्राधिकरण वा मुरगांव पालिका उबारपाक तयार ना. ताका लागून कोयर सगलो रस्त्यार आयला. पूण थंयची नितळसाण करपाक लोकप्रतिनिधी लेगीत इत्सूक नात.
वरुणापुरी जंक्शन ते शांतीनगर मजगतच्या म्हामार्गा कुशीक दोनूय वटांनी वाहनां उबी करीत आशिल्ल्यान कोयर उडोवपाचें फावता. ते वाहनाच्या आडसाक वचून कोयर उडयतात. ताका लागून थंय सगलो कोयरूच दिश्टी पडटा. घरा कणकणीं कोयर उबारत आशिल्ल्यान रस्ते वा मेकळे सुवातेर कोयर उडोवपाचे प्रकार उणें जावंक जाय आशिल्ले. पूण ‘स्वच्छ भारत अभियान’चो आरंभ जावपाचे परस सगली कडेन कोयरूच दिश्टी पडटा. हाचे पयलीं हांगासरले समाजीक कार्यकर्ते शंकर पोळजी हांणी एके वटेनचो कोयर एकठांय केल्लो. पूण आतां थंय परतून कोयर जाला. थंय कोयर उडोवप्यां आड कारवाय करपाक मुरगांव पालिका वा राष्ट्रीय म्हामार्ग प्राधिकरण कश्ट घेनाशिल्ल्याचें दिसता. केन्ना तरी मुरगांव पालिकेचे नितळसाण कामगार म्हामार्गार पातळिल्लो कोयरल उबारतात. पूण रस्त्या कुशीचो व्हड प्रमाणांत उडयिल्लें बांदकामाचें टाकावू साहित्य आनी हेर कोयर कोण उबारतलो हो एक मोटो प्रस्न आसा.
हांगा व्हड प्रमाणांत विवीध सुवातींनी भाडेकार रावतात. ते सकाळीं कामार वतना आपले बरोबर हाडिल्लो कोयर रस्त्याचे कुशीक उडयतात. ह्या भाडेकारांच्या कोयराचे पयशे घरा कणकणीं कोयर उबारपी कंत्राटदारांक दिवपाक घर धनी तयार नासतात. ताका लागून भाडेकार आपलो कोयर रस्त्याचे कुशीक उडयतात. आतां वास्को पुलिसांनी भाडेकारांची पडटाळणी सुरू केल्या. अमूक गांवांत कितले भाडेकार रावतात. तातूंतले कितले जाण घरा कणकणीं कोयर उपक्रमा खाला कामगारां कडेन कोयर दितात बी म्हायती वास्को पुलिसां कडल्यान भाडेकारा संबंदीचो अहवाल घेवन मुरगांव पालिका मेळोवंक शकतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
