भांगरभूंय | प्रतिनिधी
कोयर संकलन केंद्र काडलें, कोयर उणो जावपा बदला वाडलो
वास्को: वरुणापुरी शांतीनगर म्हामार्गार सद्या कोयराच्यो राशी पडिल्ल्यो दिसून येतात. ताका लागून म्हामार्ग हो कोयर उडोवपा खातीर आसता काय कितें असो प्रस्न वास्को भायल्या नागरिकांच्या मनांत उप्रासपाची शक्यताय आसा. सगल्यांत मजेची गजाल म्हणल्यार कोयर संकलन केंद्रा भायरूच लोक कोयर उडयतात म्हूण नगरसेवक अमेय चोपडेंकार हांणी थंयचें कोयरा संकलन केंद्रूच काडलें. पूण थंय कोयर उणो जावपा बदला व्हड प्रमाणांत वाडत आशिल्ल्याचें दिसून आयलां.
वरुणापुरी-शांतीनगर म्हामार्गार व्हड प्रमाणांत कोयर दिसून येता. ह्या म्हामार्गाचे कुशीक वाहनां उबी करीत आशिल्ल्यान ताचे खाला कोयर एकठांय जाता. म्हामार्गार व्हड प्रमाणांत एकठांय जाल्लो कोयर काडपाक पालिका तयार ना. जाल्यार म्हामार्ग प्राधिकरणाचे कामगार वयले वयर नितळसाण करून कोयर एकठांय करतात. म्हामार्ग नितळ आशिल्ल्याचो अभास थंय निर्माण करतात. पूण थंय फाटल्या दोन वर्सां सावन व्हड प्रमाणांत एकठांय जाल्लो कोयर काडप हें कोणूच मनार घेना.
ह्या मार्गार कोयर संकलन केंद्र आशिल्लें. थंय हेर कडले लोक कोयर उडयतात. असो दावो करून नगरसेवक चोपडेंकार हांणी थंयचें केंद्र काडलें. थंयची जमीन सपाट करून घेतली. पूण थंय परतून कोण कोयर उडोवचो ना हे खातीर उपाय येवजण करपाक घडये नगरसेवक विसरले आसतले. ताका लागून ते सुवाते सावन कांय अंतराचेर आतां व्हड प्रमाणांत कोयर एकठांय जायत आशिल्ल्याचें दिसून येता. जंय कोयर उडोवपाचें प्रमाण उणें वा पुरायपणान जावपाची गरज आशिल्ली. पूण थंय वेगळेंच चित्र दिसता. ताका लागून थंयचें केंद्र काडपा फाटल्यान नगरसेवक अमेय चोपडेंकार हांचो हेतू कितें आशिल्लो हे संबंदी प्रतिक्रिया व्यक्त जायत आसात.
थंयचें केंद्र काडलें. आतां थंय व्हड प्रमाणांत कोयर एकठांय जायत आसा, ताका आळो बसचो हे खातीर चोपडेंकार हांणी उपाय येवजण हातांत घेवपाची गरज आशिल्ल्याची चर्चा सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
