भांगरभूंय | प्रतिनिधी
भाजपाच्या राष्ट्रीय पदाधिकाऱ्यांची जाली बसका
नवी दिल्ली, खबरां संस्था ः येवपी लोकसभा वेंचणुकेंत भाजपा खातीर 50 टक्के मतां मेळोवपाचो हेतू दवरात, प्रधानमंत्री नरेंद्र मोदी हांणी पदाधिकारींच्या राष्ट्रीय बसकेंत हो मंत्र दिला. ही मोख साध्य करपा खातीर आनी बूथ पांवड्यार चड सक्रीय जावपा खातीर नव्या मतदारां मेरेन पावपाची गरज आसा अशेंय हे बसकेंत मोदी हांणी सुचयलें.
दिल्लींतल्या भाजपा मुख्यालयाच्या विस्तारीत इमारतींत जाल्ली दोन दिसांची बसका काल सांजवेळा सोंपली. दुसरे दिसा सात वरां चलपी विचारमंथन सत्रांत केंद्रीय गृहमंत्री अमित शाहा हांमीय वांटो घेतिल्लो. फाटले लोकसभा वेंचणुकेंत भाजपान देशभरांतलीं सुमार 40 टक्के मतां मेळोवन 303 जागे मेळयले. आतां मत टक्केवारींत 10 टक्के वाड आनी 400 लोकसभा जागेचें लक्ष्य दवरलां.
बूथ वेवस्थापनाचेर भर
भाजपाचे सुमार 250 राष्ट्रीय सरचिटणीस, उपाध्यक्ष, सगळे राज्य अध्यक्ष, प्रभारी, वेगवेगळ्या मोर्चाचे मुखेली आदी बसकेंत हाजीर आशिल्ले. अमित शाहान बूथ वेवस्थापनाचेर भर दिवपाची सुचोवणी केल्या.
मतदान परिशदो घडोवन हाडटले?
बायलां, तरणाटे, ओबीसी, दलीत, आदिवासी आनी गरीब लोकां मेरेन पावपा खातीर देशभर मतदार मंडळां घडोवन हाडटले आनी तातूंत प्रधानमंत्री मोदी वांटो घेवपाची शक्यताय आसा अशें सूत्रांनी सांगलां.
राम मंदिराचो मुद्दो
22 जानेवारीक अयोध्यांत राम मंदिराचें उक्तावण आनी राम लल्लाची प्राणप्रतिश्ठापना जातली. गांवांनी हो सुवाळो दाखोवपा खातीर व्हडले पडदे (स्क्रीन) उबारपाचीय सुचोवणी केल्या.
युपीए घोटाळे तरणाट्यां मेरेन पावयात
नव्या मतदारांक आकर्शित करपाक भाजपाचे पदाधिकाऱ्यांनी 2004- 14 ह्या काळांत युपीए सरकाराच्या भ्रश्टाचार आनी भानगडींची म्हायती दिवन आनी फाटल्या धा वर्सांत भाजपा सरकाराच्या शासन पद्दती कडेन तुळा करून नव्या मतदारांक आकर्शीत करपाक सांगलां. मोदी हांच्या फुडारपणाखाला केंद्र सरकाराच्या बऱ्या प्रशासनाचें म्हत्व नवे पिळगेक पटवप, केंद्र सरकाराच्या वेगवेगळ्या येवजण्यां विशीं म्हायती दिवप, ह्या येवजण्यांचो फायदो लावार्थ्यां मेरेन पावला काय ना हाची खात्री करपाची सुचोवणी मोदी आनी शाहान पदाधिकाऱ्यांक दिल्या, अशेंय कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
