भांगरभूंय | प्रतिनिधी
भांगरभूंय । खबरां संस्था
लुधियाना : हांगाच्या एकाच कुटुंबांतल्या तीग जाणांचो खून जाला. ही आंगार कांटो येवपा सारकी गजाल न्यू जनकपुरी वाठारांत घडली. सकाळीं धा वरांचेर दूदवालो घरा कडेन आयलो तेन्ना ही घडणूक जाल्ल्याचें कळून आयलें.
दूद घेवपा खातीर कोणेंच दार उघडूंक ना. दुबाव आयिल्ल्यान ताणें शेजार्यांक हे विशीं म्हायती दिली. दार फोडून भितर सरल्यार तीग जाण मेल्ले अवस्थेंत पडिल्ले दिसले.
चमनलाल, ताची घरकान्न सुरिंदर कौर आनी आवय बचनकौर अशीं मेल्ल्यांचीं नांवां आसात. तांची पिराय 70 ते 90 मजगतीं आसा. तांचीं भुरगीं विदेशांत रावतात. 5 जुलयाक दिसभर हीं तिगांय घरां भायर पडूंक नाशिल्ल्यान त्याच दिसा ही घडणूक घडिल्ल्याचें शेजार्यांचें म्हणणें आसा.
हे खून गळो आवळून जाल्ल्याचो दुबाव आसा. तशेंच कुडींचेर सुर्यान वार केल्ल्यो खुणोय दिसून आयल्यात.
घराचीं सगळीं दारां बंद आशिल्लीं. भायर वचपाक वाट ना. आरोपी भितर कसो आयलो हें आजून समजूंक ना. तशेंच घरांतलो गॅस, सिलींडर उक्तेच आशिल्ले.
तीन खून जाल्ल्याची म्हायती सकाळींच मेळिल्ल्याचें सहआयुक्त सौम्या मिश्रा हांणी सांगलें. पुलीस अधिकार्यांचे पंगड तयार केल्यात. गुन्यांवाचे सुवातेर एलपीजी गॅसीचोय वास येतालो. बेगीनूच आरोपींक अटक करतले अशें तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
