लांच घेतिल्ल्या प्रकरणांत दुबाविता आड आरोप निश्चीत करपाचो आदेश

भांगरभूंय | प्रतिनिधी

पणजी: म्हापशेंच्या पयलो वर्ग न्यायालयांत (डी कोर्ट) धाड घालून न्यायालयांतलो शिपाय तिळू आरोसकार हाका 200 रुपयांची लांच घेतना दक्षता खात्याच्या भ्रश्टाचार विरोधी पंगडान (एसीबी) 12 जानेवारी 2018 दिसा रंगेहात धरिल्लो. ह्या प्रकरणांत उत्तर गोंय अतिरिक्त सत्र न्यायाधीश शर्मिला पाटील हांणी दुबावीत तिळू आरोसकारा आड आरोप निश्चीत करपाचो आदेश जारी केला.

ह्या प्रकरणांत अंकीत साळगांवकारान एसीबी कडेन कागाळ दाखल केल्ली. ते प्रमाण म्हापशेंच्या येरादारी पुलिसांनी 11 जानेवारी 2018 दिसा अंकीत साळगांवकाराची जीए 03 एए 4308 क्रमांकाची खाजगी दुचाकी भाड्यान दिल्ल्याच्या आरोपा वयल्यान जप्त केल्ली. जप्त केल्लें वाहन सोडोवपा खातीर शिपाय तिळू आरोसकारान 200 रुपयांची लांच मागिल्ली.

जप्त केल्लें वाहन विशेश दंडाधिकारी न्यायालयांत दंड दिवन सोडयतात. हे खातीर वाहन सोडोवपा खातीर चार हजार रुपयांचो दंड दिवचो पडटलो अशें दुबावीत आरोसकारान कागाळदार साळगांवकाराक सांगिल्लें, आनी उपरांत ही रक्कम उणी करपा खातीर अंकीत हाणें विनंती केले उपरांत चार हजारा वयल्यान साडे तीन हजार आनी निमाणें अडेज हजार दिवपाचें थारिल्लें.

थारिल्ल्या प्रमाण 11 जानेवारी 2018 दिसा सांजवेळा कागाळदार अंकीत साळगांवकार आनी दुबावीत आरोपी तिळू आरोसकार विशेश दंडाधिकाऱ्यांच्या निवासस्थानार गेले आनी अडेज हजार रुपया तांकां दिले. उपरांत विशेश दंडाधिकाऱ्यांनी अंकीत साळगांवकाराक 500 रुपयांचो दंड दिवन चलन दिलें.

उपरांत दुबावीत आरोसकारान कागाळदार अंकीत हाचे कडेन आपले 200 रुपया कमिशन मागलें. अंकीतान भ्रश्टाचार विरोधी पंगडा कडेन संपर्क सादून कागाळ दाखल केली आनी थारिल्ल्या प्रमाण 12 जानेवारी 2018 दिसा सांजवेळा 200 रुपया लांच स्विकारतना रंगेहात धरिल्लो. एसीबीन दुबावीत तिळू आरोसकारा आड भ्रश्टाचार प्रतिबंधक कायद्याचें कलम 7, 13(1)(डी) खाला गुन्यांव दाखल करून उपरांत अटक केल्ली. उपरांत न्यायालयान ताची जामिनार सुटका केल्ली.

ह्या प्रकरणांत एसीबीन तपास पुराय करून 13 डिसेंबर 2019 दिसा उत्तर गोंय जिल्हो आनी सत्र न्यायालयांत आरोपपत्र दाखल केलें. ह्या प्रकरणांत प्रथमदर्शनी दुबाविता आड पुरावे आशिल्ल्यान आरोप निश्चीत करपाचो आदेश न्यायालयान दिला.