भांगरभूंय | प्रतिनिधी
-कोळसो प्रकल्प कर्नाटकांत व्हरचो : विजय
पणजी : वास्को ते कर्नाटका मेरेन जे रेल्वे दोट्टीकरण चालू आसा, ते फक्त कोळसो येरादारी खातीर, असो आरोप विरोधी पक्षफुडारी युरी आलेमांव आनी विजय सरदेसाय हांणी केले उपरांत सोमारा सकाळीं सभाघरांतले वातावरण बरेच तापलें. हे दोट्टीकरण कोळशा खातीर न्हय, अशें ह्या वेळार मुख्यमंत्री डॉ. प्रमोद सावंत हांणी स्पश्ट केले. तरी लेगीत विरोधक आरोप करीत रावले.
दक्षीण गोंयांत चलिल्ल्या रेल्वे दोट्टीकरणाचो (डबल ट्रॅकींग) प्रस्न सोमारा विधानसभेंत चर्चेक आयलो. ताचेर उलयतना मुख्यमंत्री डॉ. प्रमोद सावंत हांणी सांगलें, ‘लोकांची मालमत्ता नश्ट करपाचो सरकाराचो विचार ना. सर्वोच्च न्यायालयान जंय कांयच करूं नाकात, अशें म्हणलां, थंय (कांय थारावीक जागे) आमी हात पसून लावंक ना. मडगांवां उड्डाण पूल बांदपाक आमी आरबीएनएलाक लेखी कळयलां.’
हो रेल्वे मार्ग दोट्टीकरणाचो प्रकल्प रद्द करचो म्हूण कांय म्हयन्यां पयलीं व्हडलें आंदोलन जाल्लें. विधानसभेंत हाचेर गरमागरम चर्चा जाली. सरकारान कोळसो प्रकल्प कर्नाटकाक व्हरचो, अशीय मागणी आमदार विजय सरदेसाय हांणी केली.
काँग्रेस आमदार कार्लुस आल्वारीस फेरेरा हांणीय तशीच मागणी केली. तेन्नाच्या दक्षीण गोंय जिल्होधिकाऱ्यानी दक्षीण – पश्चीम रेल्वेक जमीन ताब्यांत घेवपाची सुचोवणी केल्ली, तें रेल्वेच्या 16 फेब्रुवारी 2018 च्या पत्रा वरवीं उक्तें जालां. सरकाराक कोळसो येरादारी खातीरूच हें डबल ट्रॅकींग जाल्लें जाय. हो गोंय सरकाराचो खाशेलो प्रकल्प, असो आरोप आमदारांनी केलो.
दक्षीण अस्तंत रेल्वे विभागाक 4105 चौ. मिटर जमीन जाय आशिल्ली. पूण तांणी 3089 चौ. मिटर जागो घेतला. कांसावली, वेळसांव हांगा जमनी ताब्यांत घेतल्यात. उतोड्ड्यां हस्तांतराची प्रक्रिया चालू आसा. सर्वोच्च न्यायालयान रेल्वे दोट्टीकरण प्रकल्पाचें काम थांबोवपाक सांगूंक ना, अशें येणावळ मंत्री बाबूश मोन्सेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
