भांगरभूंय | प्रतिनिधी
प्रवाशांचे सुरक्षे खातीर तात्पुरत्यो बंद: कृष्णा साळकार
कांय तंत्रीक कारणाक लागून वास्को रेल्वे स्टेशना वयल्यो प्रवासी रेल्वे कांय काळा खातीर रद्द केल्ल्यान विवीध वेवसायिकांक फटको बशिल्ल्यान तांणी निरशेणी उक्तायली. पूण सुरक्षीततायेच्या कारणाक लागून ह्यो रेल्वे तात्पुरत्यो रद्द केल्यात आनी नातलां पयलीं त्यो परतून सुरू जातल्यो अशें वास्कोचे आमदार कृष्णा साळकार हांणी सांगलें.
सद्या दक्षीण अस्तंत रेल्वे विभागा वतीन रेल्वे मार्गाच्या दोट्टीकरणाचें काम सुरू आसा. पूण 12 डिसेंबरा सावन तंत्रीक कारणाक लागून ह्याे सगल्यो प्रवासी रेल्वे सेवा तात्पुरत्यो रद्द केल्यात. पूण ऐन पर्यटन हंगामात ह्यो रेल्चे सेवा बंद केल्ल्यान विवीध वेवसायिकांनी निरशेणी उक्तायतना मंगळारा आमदार साळकार हांची भेट घेवन तांचे मुखार हो प्रस्न मांडलो. ह्या वेळार साळकार हांणी तांचे मुखार सत्य परिस्थिती दवरली.
आदले नगराध्यक्ष नंदादीप रावत हांणी म्हणलें, ह्यो रेल्वे सेवा तात्पुरत्यो बंद जाल्ल्यान ताचो रिक्षाकार, टॅक्सीकार, मोटारसायकल पायलट, रेन्ट अ कार आनी वेगळेवेगळे पदार्थ विकपी वेवसायिकांचेर जाला. तशें पळयत जाल्यार पर्यटन हंगामात तरी रेल्वे सेवा बंद दवरपाची गरज नाशिल्ली. प्रवासी रेल्वे गाडयो बंद दवरल्यात, पूण कोळशाची येरादारी करपी म्हालगाडयो सुरूच आसात. तशेंच यशवंतपूर-वास्को ही रेल्वे मडगांव स्टेशनार प्रवाशांक देंवयता. उपरांत ती रेल्वे धुंवपा खातीर वास्को हाडटात.
विनोद किनळेकार हांणी लेगीत हें काम जानेवारी वा फेब्रुवारी म्हयन्यांत हातांत घेवं येतालें अशें सांगलें. पर्यटन मोसमांत ह्यो रेल्वे सेवा बंद दवरपाची गरज नाशिल्ली. आमचो विकासकामांक विरोध ना. पूण मोसमांत विवीध विक्रेते, वेवसायीक कितें तरी जोडटले आशिल्ले. तांची जोड जावची ना हे खातीर ते निरशेल्यात अशें तांणी सांगलें.
वास्कोचे आमदार कृष्णा साळकार हांणी हो निर्णय रेल्वेच्या अधिकाऱ्यांनी प्रवाशांचे सुरक्षे खातीरूच घेतला अशें सांगलें. वास्को, मडगांव, कॅसलरॉक हांगा सिग्नलाच्यो समस्या आसात. ताका लागून एखादो अपघात जावपाचपी शक्यताय आशिल्ली. हे खातीर ते सिग्नल्स दुरुस्तीचें काम हातांत घेतलां. ते निमाण्या पांवड्यार आसा. ताका लागून नातलां पयलीं ह्यो रेल्वे सेवा परतून सुरू जातल्यो अशें तांणी स्पश्ट केलें.
ह्यो रेल्वे सेवा तात्पुरत्यो बंद करपाचे आसात हें जेन्ना आपणाक कळ्ळें तेन्ना आपणें हें काम मुखार धुकलपा संबंदी रेल्वेच्या वरिश्ठ अधिकाऱ्यांक पत्र बरयिल्लें. ते खातीर तांणी गोंयांत येवन सत्य परिस्थिती दवरली. सिग्नल्स हांचे चुकीक लागून दुर्दैवी घडणूक घडपाची शक्यताय तांणी उक्तायिल्ली. तांचें म्हणणें आमकां पटिल्लें. प्रवाशांची सुरक्षीतताय चड म्हत्वाची आशिल्ल्याचें साळकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
