भांगरभूंय | प्रतिनिधी
भांगरभूंय । खबरां संस्था
अहमदाबाद: मोदी आडनांव प्रकरणांत काँग्रेसीचे फुडारी राहुल गांधींची 2 वर्सांची ख्यास्त कायम उरतली. गुजरात उच्च न्यायालयान ताची पुनर्विचार याचिका न्हयकारल्या.
हें प्रकरण सोडल्यार राहुल गांधी हांचे आड उण्यांत उणे धा खटले प्रलंबीत आसात. अशे परिस्थितींत सुरत न्यायालयाच्या निर्णयांत हस्तक्षेप करपाची गरज ना, अशें उच्च न्यायलयान म्हणलें.
राहुल गांधीक सूरतच्या सत्र न्यायालयान 23 मार्च 2023 दिसा 2 वर्सां बंदखणीची ख्यास्त फर्मायली. पूण ह्या निकाला उपरांत 27 मिनटांनी ताका जामीन मेळ्ळो. दुसर्या दिसा 24 मार्चाक दनपरां 2:30 वरांचेर ताचें खासदार पद रद्द जालें.
ह्या निर्णयाचेर परतून विचार करचो म्हूण राहुल गांधीन सूरत न्यायालयांत पुनरावलोकन याचिका दाखल केल्ली. पूण न्यायालयान ताची सुनावणी करपाक न्हयकार दिलो. हाचे उपरांत राहुलान 25 एप्रीलाक गुजरात उच्च न्यायालयांत पुनरावलोकन याचिका दाखल केली. उपरांत 2 मे दिसा उच्च न्यायालयान ह्या प्रकरणांत आपलो निर्णय राखून दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
