भांगरभूंय | प्रतिनिधी
पणजी ः ऑक्टोबर – नोव्हेंबर म्हयन्यात गोंयांत जाल्ल्या 37व्या राश्ट्रीय खेळां सर्तींत उत्तेजक चांचणेंत सुमार 25 खेळगडे दोशी थारलें. ह्या खेळगड्यांचेर ‘नाडा’ (नॅशनल एन्टी डोपिंग एजन्सी) तात्पुरती बंदी घाल्या. देशांखाला सर्तींत एकाच वेळार इतले खेळगडे दोशी थारपाची ही पयलीच खेप.
25 ऑक्टोबर ते 9 नोव्हेंबर मेरेन गोंयांत राष्ट्रीय खेळां सर्त जाली. तातूंत वांटो घेवपी 25 खेळगड्यांची उत्तेजक चांचणेचो अहवाल पॉझिटिव्ह आयला. हातूंतल्या कांय खेळगड्यांक पदकां मेळ्ळ्यांत आनी कांय खेळगडे आंतरराश्ट्रीय खेळगडे आशिल्ल्याचे मुखार आयलां.
सर्तींत वेटलिफ्टिंग, अॅथलेटिक्स, कुस्ती, सायकलिंग, ज्युडो, फुटबॉल, वुशू आनी लॉन बाऊल्स अशा खेळांत वांटो घेवपी खेळगड्यांनी बंदी घाल्ले पदार्थ वापरिल्ल्याचें दिसून आयले उपरांत हंगामी निलंबनाची कारवाय केल्या.
मजगतीं, उत्तेजक चांचण्यांनी दोशी थारिल्ल्या खेळगड्यांक दोन ते चार वर्सां बंदी घालची पडटा. 2015 वर्सा केरळांत जाल्ले राष्ट्रीय सर्तींत 16 जाल्यार फाटल्या वर्सा गुजरातांत जाल्ले सर्तींत 10 खेळगडे उत्तेजक चांचणींत दोशी थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
