राज्यांत आनीक दोन खून

भांगरभूंय | प्रतिनिधी

सप्तकभरांत 7 खुनांची नोंद, राज्यांत भिरांतीचें वातावरण

पणजी : राज्यांत सप्तकभरांत सुरू आशिल्लें खुनांचें सत्र शुक्रारा लेगीत सुरूच उरलें. शुक्रारा खुनाच्यो दोन घडणुको घडल्यो. दक्षीण गोंयांंत दवर्ले रुमडामळ घरनिर्माण वसणुकेंत सादीक बेल्लारी हाचो खून जालो. आदल्या दुस्मानकायेंतल्यान हो खून जालो. तशेंच पर्वरे सांंजे वेळार बेपत्ता आशिल्ल्या कामाक्षी उड्डापनोव हिची कूड आंंबोली (महाराष्ट्र) घाटांत मेळ्ळी. तिच्या मोग्यानूच फ्लॅटांत तिचो खून करून तिची कूड आंंबोली घाटांत व्हरून पुरली. मजगतीं, लोटले- अंंबोरा हांगा एक मनीस गंंभीर स्थितींत मेळ्ळो. ताचे मानेचेर घाये आशिल्ले. हाचो तपास पुलीस करतात.

सोबीत आनी शांंत गोंयांत शांतताय इबाडपाक लागल्या, अशो घडणुको घडपाक लागल्यात. शिक्षणीक संंस्थांंनी लिंगीक अत्याचाराच्यो घडणुको घडटात, तशेंच राज्यांत खुनांच्योय घडणुको घडपाक लागल्यात. ह्या सप्तकांत आतां मेरेन खुनाचे 7 घडणुको घडल्यो. हातूंत बिगर गोंयकारांचो आस्पाव आसा.

मजगतीं, बुधवारा राज्यांत खुनाच्यो तीन घडणुको घडल्यो. दिवचले सेतू संंगमाचेर बेळगांवच्या तरणाट्याचो खून जालो. बाणस्तारी मार्केटा लागसार बायलेची कूड मेळ्ळी. गळो अंदूंन तिचो खून केल्लो. फातोड्ड्यां एका कामगाराचे तकलेर फातर घालून ताचो खून केलो. खून जाल्ले सगले बिगर गोंयकार आशिल्ले. आतां शुक्रारा आनीक दोन खुनाच्यो घडणुको घडल्यो. सप्तकांत वट्ट सात खुनाचे घडणुको घडल्यो. ताका लागून राज्यांत कायदो आनी सुवेवस्थे विशीं प्रस्न निर्माण जाला.

सादीकाचो आदले दुस्मानकायेंतल्यान खून

दवर्ले रुमडामळ घरनिर्माण वसणुकेंत सादीक बेल्लारी (23) हाचो सकाळीं खून जालो. खुनाच्या गुन्यांवांत कादयेंत आशिल्ल्या सादीक बेल्लारी हाची हालींच जामिनाचेर सुटका जाल्ली. सकाळीं घरांतली मनशां भायर गेले उपरांत अनवळखी घरांत घुसून न्हिंदे​त आसतना धारदार शस्त्रान सादिकाचो खून केलो. हाचे पयलीं सादिकाक जिवेशी मारपाच्यो धमक्यो येताल्यो. आदले दुस्मानकायेचो बदलो घेवपाच्या हेतान हो ख‍ून जाला, असो दुबाव आसा. सादीक खून प्रकरणांत पुलिसांंनी दुबावीत कादर खान खानजाद (28) आनी तौसिफ कदेमणी (20) हांंकां अटक केल्या. हे दोगूय कर्नाटकांतले आसात.

मजगतीं, सादीक बेल्लारी हाची फाटभूंय गुन्यांवकारी आशिल्ली. 2020 त मुजाहीद खान हाका भोसकून मारिल्ल्याचो आरोप सादिकाचेर आसा. ह्या आरोपा खातीर तीन वर्सां तो बंदखणींत आशिल्लो. सध्या तो जामिनाचेर भायर आशिल्लो. हे घडणुकेक लागून रुमडामळ – दवर्ली सयत साश्ट म्हालांत भिरांतीचें वातावरण आसा.

मोग प्रकरणांतल्यान तरणाटेचो खून

पर्वरे बेपत्ता आशिल्ल्या कामाक्षी उड्डापनोव (33) हिची कूड आंंबोली घाटांत मेळ्ळी. तिचो मोगी प्रकाश चुंंचवाड (22) हाका पुलिसांंनी अटक केल्या. मोग फिस्कटिल्ल्यान तशेंच तिणें मुखार संबंद दवरपाक न्हयकार दिल्ल्यान आपणे खून केल्याची कबुली दुबावीत प्रकाश चुंचवाड हाणें दिली. ताका घेवन पुलीस आंंबोली घाटांत पावले, आनी देगणांत पुरिल्ली कूड भायर काडली. ह्या खून प्रकरणांत पुलिसांनी दुबावित प्रकाश चुंंचवाड हाचो साथीदार निरूपडी कडकात (21) हाका अटक केल्या. तो पर्वरी सुकूर रावता.

मेळिल्ले म्हायती प्रमाण, कामाक्षी उड्डापनोव आनी प्रकाश चुंचवाड हांचो एकामेकां कडेन मोग आशिल्लो. पूण कांय काळा उपरांत तांचे मदीं भेदभाव निर्माण जाले. ताका लागून कामाक्षी हिणें प्रकाशा कडेन संबंद दवरपाक न्हयकार दिलो. ह्याच तिडकेंतल्यान प्रकाशान पर्वरे तिच्या फ्लॅटार वचून तिचो खून केलो. उपरांत तिची कूड आंबोली घाटांत व्हरून पुरली.