राज्यपालांच्या संपूर्ण गोंय यात्रेचो आयज जाता समारोप

भांगरभूंय | प्रतिनिधी

राज्यपालांची आयज सांखळी मतदारसंघाक भेट

पणजी : राज्यपाल पीएस श्रीधरन पिल्लई हे आयज मुख्यमंत्री डॉ. प्रमोद सावंत हांच्या सांखळी मतदारसंघाक भेट दितले. सांखळी मतदारसंघाचे भेटयेन तांची संपूर्ण गोंय यात्रेचो आयज समारोप जाता. ह्या वेळार तांची मतदारसंंघात कार्यावळ जातली. मुख्यमंत्री डॉ. प्रमोद सावंत कार्यावळीक हाजीर रावतले.

राज्यपालांच्या संपूर्ण गोंय यात्रेचो औपचारीक समारोप 26 नोव्हेंबराक जातलो. राजभवनाचेर 26 नोव्हेंबराक सकाळीं 11 वरांचेर खासा कार्यावळ जातली. हे कार्यावळीक केरळचे राज्यपाल ​अरीफ मोहम्मद खान हाजीर रावतले. राजभवन कचेरेंतल्यान ही म्हायती दिल्या.

राज्यपाल श्रीधरन पिल्लई हे नामनेचे साहित्यीक आसात. गोंयांत आयले उपरांत ते लोकप्रतिनीधींच्यो भेटी घेवपा सयत गांवगिऱ्या वाठारांनी भेटी दीत आसात. 17 सप्टेंबर 2021 ह्या दिसा राज्यपालांनी गांवगिऱ्या वाठारांची भोंवडी करपाचो संकल्प केलो. 17 सप्टेंबर दिसा प्रधानमंत्री नरेंद्र मोदी हांचो जल्मदीस. प्रधानमंत्र्यांच्या जल्मदिसाच राज्यपालांनी संपूर्ण गोंय यात्रेचो संकल्प केलो.

संपूर्ण गोंय यात्रेंत गांवांक भेटी दिवपा सयत पंच, सरपंचां कडेन संवाद सादपाच्यो कार्यावळी जाल्यो. राज्यपालांनी 15 म्हयन्यांत 403 गांव वा वाठारांक भेटी दिल्यात. हे यात्रेंत तांणी 1500 लोकप्रतिनिधीं कडेन संवाद सादलाे. राजभवनाचो 2 कोटी 75 लाखांचो निधी तांणी गरजेवंतांक वांटलाे. गांवगिऱ्यां वाठारांक भेटी दिवपा सयत पंच तशेंच सरपंचां कडेन राज्यपालांनी संवाद सादपाची ही पयलीच खेप आसा.

कांक्राचे दुयेंती तशेंच डायलिसीस दुयेंतींक आपत्कालीन निधी खाला अर्थीक मजतीचें वांटप जालें. राज्यपालां कडल्यान 1005 दुयेंतींक अर्थीक मजत मेळ्ळ्या. राज्यांतल्या 91 संस्थांक अर्थीक मजतीचें वांटप जालां.

राज्यपाल पिल्लई हांणी पंच तशेंच सरपंचांची गाराणी आयकून घेतली. तांचे कडल्यान निवेदनांचो स्विकार केलो. कारवाये खातीर हीं निवेदनां सरकारी खात्यांक धाडून दिल्यात.

राज्यपाल पिल्लई हे साहित्यीक आसात. तांचे तरेकवार विशयांचेर वाचन सुरूच आसता. गोंयची देवळां, चर्ची तशेंच संस्कृतायेचेर आधारीत ते पुस्तकां बरयतले. तांणी लिखाण सुरू केलां.

आयज राज्यपाल सांखळी मतदारसंघाक भेट दितले. संपूर्ण यात्रेचो तांचो हो निमाणो मतदारसंघ आसा. हाचे पयलीं सगल्या 39 मतदारसंघांनी तांणी भेट दिल्या. सकाळीं 11 वरांचेर ते सुर्लाच्या इतिहासीक मशिदीक भेट दितले. ही मशीद दायज थळ आसा. पुरातत्व खात्यान ताची दुरुस्ती केल्या. हाचे उपरांत हरवळेच्या रुद्रेश्वर देवस्थानांत ते देवाचे दर्शन घेतले. सांखळेच्या रवींद्र भवनांत सरपंच तशेंच पंचां कडेन ते संवाद सादतले. सुर्ला, आमोणें, पाळी, कुडणें, नावेली, हरवळें गांवचे सगले पंच रवींद्र भवनांत एकठांय जातले. ह्या वेळार डायलिसीस वा कांक्राच्या दुयेंतींक अर्थीक मजतीचे वांटप जातलें.