भांगरभूंय | प्रतिनिधी
सदानंद तानावडे, बाबूश मोंसेरात, उत्पल पर्रीकार, विश्वजीत राणे हांणी मनयली होळी
पणजी : कलाकारां सयत सामान्य मनशांची होळी ही उमेदीची परब. चवथ, दिवाळी इतलीच गोंयांत होळयेची उमेद आसता. मंगळारा शारां सयत गांवगिऱ्या वाठारांतल्या लोकांनी होळी मनयली. मंत्री, आमदार आनी एकंदर राजकारण्यांनी लेगीत हेर लोकां सयत होळयेचे रंग खेळ्ळे.
येणावळ मंत्री तशेंच पणजीचे आमदार बाबूश मोंसेरात, प्रदेश भाजप अध्यक्ष सदानंद शेट तानावडे, भलायकी मंत्री विश्वजीत राणे, आमदार देविया राणे, कळंगूटचे आमदार मायकल लोबो, भौशीक बांदकाम खात्याचे मंत्री निलेश काब्राल, येरादारी मंत्री मॉवीन गुदिन्हो, आमदार संकल्प आमोणकार हे सगले जाण होळयेच्या कार्यावळींनी वांटेकार जाल्ले, अशी म्हायती गोपांनी दिली.
पणजी शिगमोत्सव समिती वतीन दर वर्सा होळयेच्या दिसा गुलालोत्सव जाता. संगिताच्या तालार नाचत नाचत सगले जाण एकामेकांचेर रंग उडयतात. पणजेंतले खूबशे लोक गुलोलोत्सवाचो आनंद घेतात. आदले मुख्यमंत्री सर्गेस्त मनोहर पर्रीकार हे दर वर्सा गुलालोत्सवांत वांटेकार जाताले. अंदूं मंत्री बाबूश मोंसेरात तशेंच उत्पल पर्रीकार हांणी गुलालोत्सवांत वांटो घेतलो. संगिताच्या तालार खूबसो वेळ ते रंगात न्हाले.
होळयेच्या दिसा शारी तशेच गांवगिऱ्या वाठारांत लेगीत कार्यावळी जातात. कारापूर सर्वण हांगा गडे उत्सव जालो. सावर्शें सत्तरी हांगा चोरोत्सव जालो. प्रदेश भाजप अध्यक्ष सदानंद शेट तानावडे हांणी धोल वाजोवन शिगम्याची पदां म्हणलीं. कळंगूटचे आमदार मायकल लोबो हे लेगीत कळंगूटे धोलाच्या तालाचेर खूबसाे वेळ नाचले. हिंदू वांगड्यां सयत तांणी होळी मनयली. भौशीक बांदकाम खात्याचे मंत्री निलेश काब्राल हांणी कुडचड्यार ल्हान वांगड्यां सयत होळी मनयली. सगल्याक भोंवून तांणी रंगांचे टिळे लायले.
भलायकी मंत्री विश्वजीत राणे तशेंच आमदार देविया राणे हांणी सावर्श्यां चोरोत्सवांत वांटो घेतलो.
वास्को हांगा दामोदर देवस्थानांत गाराणें घालून शिगम्याक सुरवात जाली. येरादारी मंत्री मॉवीन गुदिन्हो, आमदार संकल्प आमोणकार, आमदार कृष्णा साळकार हांणी दामोदर देवस्थानाक भेट दिली. उपरांत सगल्या लोकां सयत तांणी होळी मनयली. मंगळारा होळयेची सुटी आशिल्ली. आमदार तशेंच मंत्र्यांनी आपआपल्या मतदारसंघांनी होळयेचो आनंद घेवपाक पसंती दिली.
रस्त्यार गाडयो आडावन शाबय मागपाचे प्रकार सगल्याक सुरू आसले. भौशीक थळांचेर एकामेकाक रंगोवपाचे प्रकार सगले कडेन जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
